لاہور۔وزیراعلیٰ پنجاب مریم نواز نے دیگر صوبوں کے طلبہ کے لیے بھی ہونہار سکالرشپ سکیم کی منظوری دے دی۔
وزیراعلیٰ پنجاب مریم نواز کی زیر صدارت ایک خصوصی اجلاس منعقد ہوا جس میں ہائر ایجوکیشن سے متعلق اہم فیصلے کیے گئے۔ وزیراعلیٰ مریم نواز نے پنجاب میں سیکنڈ ایئر، تھرڈ ایئر اور فورٹھ ایئر کے طلبہ کے لیے ہونہار سکالرشپ کی باضابطہ منظوری دی، جبکہ پنجاب میں طلبہ کے لیے لیپ ٹاپس کی تعداد بڑھا کر ایک لاکھ 10 ہزار کر دی۔
پنجاب میں لیپ ٹاپ حاصل کرنے کے لیے کم از کم 65 فیصد اہلیت کی شرط رکھی گئی ہے، اور دیگر صوبوں کے طلبہ کے لیے بھی پنجاب کی طرح اہلیت کا یکساں معیار مقرر کیا گیا ہے۔ وزیراعلیٰ پنجاب نے ہونہار سکالرشپ اور لیپ ٹاپ سکیم کے حوالے سے طلبہ کے لیے ایک خصوصی ہیلپ لائن قائم کرنے کی ہدایت بھی کی۔
اجلاس کے دوران وزیراعلیٰ پنجاب مریم نواز کا کہنا تھا کہ ہونہار سکالرشپ اور لیپ ٹاپ ہر بچے کا حق ہیں اور حکومت کی ذمہ داری ہے۔ تعلیم اور یوتھ قوم کی اصل سرمایہ کاری ہے، اور دل چاہتا ہے کہ ہر بچے کو لیپ ٹاپ ملے۔ انہوں نے مزید کہا کہ لیپ ٹاپ اور ہونہار سکالرشپ دیگر صوبوں کے طلبہ کا بھی حق ہیں۔
مریم نواز نے کہا کہ آزاد کشمیر، گلگت بلتستان، بلوچستان اور خیبرپختونخوا سمیت دیگر صوبوں کے طلبہ بھی ہمارے بچے ہیں، اور میرٹ پر آنے والا ہر بچہ اچھے کالج میں داخلہ لے سکتا ہے، جس کی فیس حکومت ادا کرے گی۔ انہوں نے یہ بھی کہا کہ وہ ماں کی طرح سوچتی ہیں اور ہر بچے کی تقدیر بدلنا چاہتی ہیں۔ ہونہار سکالرشپ کے لیے جو معیار پنجاب میں ہے، وہی دیگر صوبوں کے طلبہ کے لیے بھی اپنایا جائے گا۔
وزیراعلیٰ پنجاب نے یہ بھی کہا کہ طلبہ کے لیے کسی بھی سکیم میں فنڈز کی فراہمی میں کسی قسم کی رکاوٹ کو برداشت نہیں کیا جائے گا۔
