صدرِ مملکت آصف علی زرداری چار روزہ سرکاری دورے پر اسلام آباد سے چین روانہ ہوگئے ہیں۔
یہ دورہ 4 فروری سے 8 فروری تک جاری رہے گا، جس کے دوران صدر زرداری ایک اعلیٰ سطحی وفد کے ہمراہ بیجنگ روانہ ہوئے۔ وفد میں نائب وزیر اعظم و وزیر خارجہ اسحٰق ڈار، وزیر داخلہ محسن نقوی، سینیٹر سلیم مانڈوی والا اور ڈاکٹر عاصم حسین شامل ہیں۔
صدر زرداری یہ دورہ چینی صدر شی جن پنگ کی خصوصی دعوت پر کر رہے ہیں، جس میں دونوں ممالک کے درمیان دوطرفہ تعلقات اور اہم امور پر تبادلہ خیال کیا جائے گا۔ اس دوران صدر زرداری چینی صدر شی جن پنگ، وزیر اعظم لی چیانگ، اور دیگر اعلیٰ چینی حکام سے ملاقاتیں کریں گے، جن میں اقتصادی و تجارتی تعاون، انسدادِ دہشت گردی، سیکیورٹی تعاون، اور چین-پاکستان اقتصادی راہداری (CPEC) سمیت مختلف ترقیاتی منصوبوں پر بات چیت ہوگی۔
علاوہ ازیں، عالمی اور علاقائی جغرافیائی سیاسی صورتحال اور کثیرالجہتی فورمز پر تعاون کے حوالے سے بھی گفتگو کی جائے گی۔ صدر زرداری چینی حکومت کی خصوصی دعوت پر ہربن میں منعقد ہونے والے نویں ایشیائی سرمائی کھیلوں کی افتتاحی تقریب میں بھی شرکت کریں گے۔
دوسری جانب، وزیر اعلیٰ سندھ سید مراد علی شاہ، سینئر وزیر شرجیل انعام میمن، اور صوبائی وزیر سید ناصر حسین شاہ پہلے ہی چین پہنچ چکے ہیں، جہاں بیجنگ ایئرپورٹ پر پاکستانی سفارتخانے کے اعلیٰ اہلکاروں نے ان کا استقبال کیا۔
سندھ حکومت کا وفد چین میں مختلف تجارتی اور صنعتی شخصیات سے ملاقاتیں کرے گا اور سندھ میں سرمایہ کاری کے مواقع پر بریفنگ دے گا۔ ملاقاتوں میں زراعت، توانائی، ٹرانسپورٹ، انفراسٹرکچر، اور ٹیکنالوجی کے شعبوں میں مشترکہ منصوبوں پر بھی تبادلہ خیال ہوگا۔
