اسلام آباد ۔اسلام آباد میں ایک انوکھا فوٹو شوٹ وائرل ہوگیا جس میں ایک جوڑے نے کنٹینرز کے درمیان اپنی شادی کی خوشیوں کو منفرد انداز میں منایا۔ خولہ اور قاسم نے اپنی زندگی کے اس اہم دن کو غیر معمولی حالات کے باوجود بہت خاص طریقے سے منایا، جس نے سب کی توجہ حاصل کی۔
خولہ اور قاسم کی تصاویر اور ویڈیوز سوشل میڈیا پر تیزی سے پھیل گئیں، جس نے لوگوں کو خوشگوار حیرت میں مبتلا کر دیا۔ ان تصاویر کو فوٹوگرافر “دی ٹیلنٹ اسٹوڈیوز” نے انسٹاگرام پر شیئر کیا، جن میں خولہ نے سلور گرے اور قاسم نے چاندی کے رنگ کا سوٹ پہنا ہوا تھا۔
سوشل میڈیا صارفین نے ان تصاویر پر اپنے ردعمل کا اظہار کرتے ہوئے جوڑے کو ان کے یادگار لمحات پر مبارکباد دی۔ ایک صارف نے کہا کہ چاہے حالات کیسے بھی ہوں، زندگی کا سفر رکنا نہیں چاہیے، جبکہ دوسرے صارف نے مزاحیہ انداز میں سوال کیا کہ کیا پس منظر میں آنسو گیس بھی شامل ہو سکتی ہے؟
