کراچی: امریکی صدر ڈونلڈ ٹرمپ کی جانب سے ٹیرف میں تین ماہ کے لیے نرمی کے اعلان کے بعد پاکستان اسٹاک ایکسچینج میں زبردست تیزی دیکھنے میں آئی، اور کاروباری ہفتے کے چوتھے روز (جمعرات) کے آغاز پر کے ایس ای 100 انڈیکس میں 3300 سے زائد پوائنٹس کا اضافہ ریکارڈ کیا گیا۔
کاروباری دن کے آغاز پر انڈیکس 2.92 فیصد اضافے کے ساتھ 117891 پوائنٹس کی سطح تک پہنچ گیا، جبکہ گزشتہ روز انڈیکس 114153 پوائنٹس پر بند ہوا تھا۔
تاہم دن کے دوران معمولی اتار چڑھاؤ کے بعد انڈیکس میں 2563 پوائنٹس کا مجموعی اضافہ برقرار رہا، اور کاروبار کے اختتام پر انڈیکس 116716 پوائنٹس پر بند ہوا۔
تجزیہ کاروں کے مطابق امریکی فیصلے نے عالمی سطح پر سرمایہ کاروں کے اعتماد کو بحال کیا ہے، جس کے مثبت اثرات پاکستانی مارکیٹ پر بھی نمایاں ہوئے۔ سرمایہ کاروں کی جانب سے خریداری میں اضافے کے باعث مارکیٹ میں بھرپور سرگرمی دیکھی گئی۔
