پاکستان سپر لیگ (پی ایس ایل) سے متعلق حالیہ بیانات کے تناظر میں کراچی کنگز کے مالک سلمان اقبال نے ردعمل دیتے ہوئے لیگ اور اس کے انتظامی ڈھانچے کا دفاع کیا ہے۔
ملتان سلطانز کے مالک علی ترین کی جانب سے پی ایس ایل کے رینٹل ماڈل پر تحفظات کے اظہار کے بعد سلمان اقبال نے کہا کہ لیگ کی ساکھ ہم سب کے لیے اہم ہے، اور اس پر تنقید کرنے کے بجائے اسے مزید بہتر بنانے کے لیے مشترکہ طور پر کوششیں ہونی چاہئیں۔
انہوں نے واضح کیا کہ پی ایس ایل کا آغاز جب ہوا تو مختلف حلقوں کی جانب سے شکوک و شبہات کا سامنا رہا، بالخصوص ہمسایہ ملک کے میڈیا کی جانب سے۔ “مگر سب سے زیادہ افسوس تب ہوتا ہے جب لیگ کا حصہ رہنے والا ہی کوئی ساتھی ایسی باتیں کرے جو لیگ کو کمزور کرے،‘‘ سلمان اقبال نے کہا۔
انہوں نے مزید کہا کہ پاکستان سپر لیگ ہمارے ملک کی پہچان اور فخر بن چکی ہے۔ پی سی بی کی موجودہ انتظامیہ، خاص طور پر سلمان نصیر اور ان کی ٹیم، لیگ کی ترقی کے لیے انتھک محنت کر رہی ہے۔ ’’اس وقت ہمیں ایک مثبت سوچ کے ساتھ آگے بڑھنا ہوگا اور بحیثیت ٹیم مالکان پی سی بی کا ساتھ دینا چاہیے،‘‘ انہوں نے زور دیا۔
واضح رہے کہ علی ترین نے اپنے ایک حالیہ انٹرویو میں پی ایس ایل کے “رینٹل ماڈل” پر اعتراض اٹھایا تھا، ان کا مؤقف تھا کہ موجودہ نظام میں فرنچائز مالکان محض کرایہ دار کی حیثیت رکھتے ہیں جنہیں مکمل ملکیتی حقوق حاصل نہیں۔
علی ترین نے کہا تھا کہ اگر مالکان فیس ادا نہ کریں تو ٹیم سے ان کا تعلق ختم کیا جا سکتا ہے، جو اس ماڈل کی پائیداری پر سوالیہ نشان ہے۔
دونوں مالکان کے بیانات سے ایک بات ضرور واضح ہے کہ لیگ کی بہتری اور شفافیت کے لیے کھلا مکالمہ ضروری ہے، تاکہ پی ایس ایل مزید مضبوط بنیادوں پر آگے بڑھ سکے۔
