واشنگٹن: تقریباً دو درجن امریکی ریاستوں نے صحت کے شعبے میں فنڈز میں کٹوتیوں کے خلاف قانونی کارروائی شروع کر دی ہے۔
ریاستوں کے اٹارنی جنرلز نے ٹرمپ انتظامیہ کے خلاف رہوڈ آئی لینڈ کی فیڈرل کورٹ میں درخواست دائر کی، جن میں نیویارک، کولوراڈو، پنسلوانیا اور کولمبیا شامل ہیں۔
مقدمے میں یہ الزام عائد کیا گیا ہے کہ ٹرمپ انتظامیہ نے 11 ارب ڈالرز کی کٹوتی غیرقانونی طور پر کی، جس سے عوامی صحت کو شدید نقصان پہنچے گا اور آئندہ وبائی بیماریوں کے پھیلنے کا خطرہ بڑھ جائے گا۔
عدالت سے درخواست کی گئی ہے کہ فوری طور پر کٹوتی کو روکا جائے کیونکہ یہ فنڈز کووڈ 19 کی ٹیسٹنگ، ویکسینیشن اور ذہنی صحت کے پروگراموں کے لیے مختص تھے۔
یو ایس ہیلتھ اینڈ ہیومن سروسز ڈیپارٹمنٹ نے کٹوتیوں پر کوئی بیان دینے سے گریز کیا ہے، تاہم یہ کہا ہے کہ فنڈز اب وبا کے خاتمے کے بعد ضائع نہیں کیے جائیں گے۔
اس فیصلے کے نتیجے میں ہزاروں افراد کی نوکریاں خطرے میں ہیں اور بیماریوں کی روک تھام کی کوششوں پر منفی اثرات مرتب ہو سکتے ہیں۔
