اسلام آباد ۔ملک بھر میں جمعۃ الوداع اور یوم القدس عقیدت و احترام کے ساتھ منایا گیا۔ اس موقع پر فلسطینی عوام کے لیے خصوصی دعاؤں کا اہتمام کیا گیا، جبکہ مختلف شہروں میں ریلیاں نکال کر ان سے یکجہتی کا بھرپور اظہار کیا گیا۔
پاکستان کے بڑے شہروں بشمول اسلام آباد، کراچی، لاہور، پشاور اور کوئٹہ میں جمعۃ الوداع کے اجتماعات منعقد کیے گئے۔ مساجد میں ملکی استحکام، ترقی اور سلامتی کے لیے خصوصی دعائیں کی گئیں۔
اسلام آباد میں مختلف مساجد میں جمعۃ الوداع کی نماز ادا کی گئی، جہاں سب سے بڑا اجتماع فیصل مسجد میں منعقد ہوا۔ اس موقع پر سخت حفاظتی اقدامات بھی کیے گئے۔ فیصل مسجد سمیت دیگر مساجد اور امام بارگاہوں کے لیے جامع سیکیورٹی انتظامات کیے گئے۔
گلگت بلتستان اور آزاد کشمیر میں بھی جمعۃ الوداع کے بڑے اجتماعات منعقد ہوئے۔ کراچی میں 27 رمضان المبارک کو بعد نماز جمعہ نمائش تا تبت سینٹر یوم القدس ریلی نکالی گئی۔
مجلس وحدت المسلمین سمیت مختلف مذہبی تنظیموں کی جانب سے یوم القدس کی مناسبت سے ریلیاں منعقد کی گئیں، جبکہ نمائش چورنگی پر استقبالیہ کیمپ بھی لگایا گیا۔
کراچی میں یوم القدس ریلی کے لیے خصوصی ٹریفک پلان تشکیل دیا گیا۔ لاہور میں بھی یوم القدس کے موقع پر اسلام پورہ میں ریلی نکالی گئی، جہاں شرکاء نے فلسطینی عوام کے حق میں نعرے بلند کیے۔
محکمہ داخلہ پنجاب نے جمعۃ الوداع، یوم القدس اور عیدالفطر کے دوران سیکیورٹی انتظامات کے حوالے سے اہم ہدایات جاری کیں۔ مراسلے میں کہا گیا کہ عبادت گاہوں کے تحفظ کو یقینی بنانے کے لیے فول پروف سیکیورٹی انتظامات کیے جائیں، سخت نگرانی رکھی جائے، اور اضافی سیکیورٹی اہلکار تعینات کیے جائیں۔ شہریوں کے داخلے کے لیے ایک مرکزی دروازہ مخصوص کیا جائے۔
پشاور اور خیبر پختونخوا کے دیگر شہروں میں بھی یوم القدس کے موقع پر فلسطین کی آزادی کے حق میں مظاہرے کیے گئے۔ صدر پشاور کی سنہری مسجد کے باہر متحدہ علماء و مشائخ کونسل کی جانب سے احتجاجی مظاہرہ کیا گیا۔
پشاور میں جمعۃ الوداع کے موقع پر سخت سیکیورٹی انتظامات کیے گئے، مختلف مساجد کے باہر 1500 سے زائد پولیس اہلکار تعینات رہے۔ سیکیورٹی حکام کے مطابق نگرانی کے لیے سراغ رساں کتوں اور میٹل ڈیٹیکٹر کا بھی استعمال کیا گیا، جبکہ نواحی علاقوں میں پولیس گشت بڑھا دیا گیا۔
سندھ کے شہر ٹھٹھہ میں یوم القدس کی مناسبت سے اسرائیلی جارحیت کے خلاف احتجاجی مظاہرہ کیا گیا، جہاں فلسطینی عوام کے ساتھ یکجہتی کا اظہار کیا گیا۔
نوشہرو فیروز میں یوم القدس کے موقع پر مرکزی امام بارگاہ حسینی سے پریس کلب تک ریلی نکالی گئی، جس میں علمائے کرام اور عوام کی بڑی تعداد شریک ہوئی۔
پنجاب کے شہر بھوانہ میں بھی یوم القدس کی مناسبت سے ریلی منعقد کی گئی، جہاں اسرائیلی جارحیت کے خلاف نعرے بلند کیے گئے، اور تحصیل بھر سے شہریوں نے بڑی تعداد میں شرکت کی۔
