بالی ووڈ کے مسٹر پرفیکشنسٹ عامر خان نے حال ہی میں انکشاف کیا ہے کہ ایک وقت پر انہیں یہ لگنے لگا تھا کہ ان کے حریف سلمان خان اور شاہ رخ خان ان کا کیریئر ختم کر کے انہیں بالی ووڈ سے نکالنا چاہتے ہیں۔
عامر خان کی مشہور فلم دنگل ریلیز ہونے کے بعد بڑی ہٹ ثابت ہوئی تھی، جس میں انہوں نے شاندار پرفارمنس دی اور فلم میں اپنے جسمانی تغیر کی وجہ سے خاص توجہ حاصل کی۔ اس فلم میں فاطمہ ثنا شیخ، سانیا ملہوترا اور دیگر نے بھی بہترین کردار نبھائے، جس سے فلم کو بے پناہ پذیرائی ملی۔
تاہم، عامر خان نے حال ہی میں بتایا کہ وہ ابتدا میں دنگل کا کردار قبول کرنے میں ہچکچاہٹ کا شکار تھے اور انہیں شک تھا کہ شاہ رخ خان اور سلمان خان نے ان کے کیریئر کو نقصان پہنچانے کے لیے ہدایت کار نتیش تیواری کو اس پروجیکٹ کی پیشکش بھیج کر سازش کی ہے۔ عامر کا کہنا تھا کہ چونکہ ماضی میں تینوں خانز کے درمیان اختلافات رہے ہیں، اس لیے وہ یہ سوچنے پر مجبور ہو گئے تھے کہ اس فلم میں ان کا کردار ان کے کیریئر کو ختم کرنے کی کوشش ہو سکتی ہے۔
عامر خان نے ایک انٹرویو میں اپنے ابتدائی ردعمل کو یاد کرتے ہوئے کہا کہ جب نتیش تیواری نے اسکرپٹ پڑھ کر سنایا تو وہ فوراً اس سے متاثر ہو گئے اور فلم کے لیے بے چین ہو گئے۔ تاہم، دھوم 3 میں اپنی دبلی پتلی جسمانی حالت کے بعد، 55 سالہ اور بڑھے ہوئے وزن کے ساتھ چار بیٹیوں کے والد کے کردار کو قبول کرنا ان کے لیے مشکل تھا۔
انہوں نے بتایا کہ آغاز میں وہ یہ چاہتے تھے کہ فلم کو 10-15 سال کے لیے مؤخر کر دیا جائے تاکہ وہ اس کردار کے لیے مزید بہتر تیار ہو سکیں۔ لیکن فلمساز نتیش تیواری ان کے ساتھ ہی یہ فلم بنانا چاہتے تھے۔
آخرکار، عامر خان نے کہا کہ دنگل کی زبردست کہانی نے انہیں اتنا متاثر کیا کہ وہ اسے اپنے دماغ سے نکال نہ سکے اور انہوں نے فیصلہ کیا کہ وہ اس فلم کا حصہ بنیں گے۔ عامر کا کہنا تھا کہ اگر یہ فلم ان کے کیریئر کا اختتام ثابت ہوئی تو وہ اسے کھلے دل سے قبول کر لیں گے۔
