اسلام آباد ۔ پاک فوج کے سربراہ جنرل سید عاصم منیر کی والدہ محترمہ بقضائے الہیٰ وفات پا گئیں۔ اللہ تعالیٰ مرحومہ کی مغفرت فرمائے، ان کے درجات بلند کرے اور جنت الفردوس میں اعلیٰ مقام عطا فرمائے، آمین۔
صدر مملکت آصف علی زرداری، وزیر اعظم شہباز شریف اور دیگر اعلیٰ حکومتی و عسکری شخصیات نے جنرل سید عاصم منیر کی والدہ کے انتقال پر گہرے دکھ اور افسوس کا اظہار کیا۔
صدر مملکت آصف علی زرداری نے افسوس کا اظہار کرتے ہوئے کہا کہ وہ جنرل عاصم منیر کے غم میں برابر کے شریک ہیں اور اللہ تعالیٰ سے مرحومہ کے درجات کی بلندی اور سوگوار خاندان کے لیے صبر جمیل کی دعا کرتے ہیں۔
وزیر اعظم محمد شہباز شریف نے بھی اظہار تعزیت کرتے ہوئے کہا کہ وہ اس دکھ کی گھڑی میں سوگوار خاندان کے ساتھ کھڑے ہیں اور مرحومہ کی مغفرت اور بلند درجات کے لیے دعاگو ہیں۔
قومی اسمبلی کے اسپیکر سردار ایاز صادق نے بھی آرمی چیف اور ان کے اہل خانہ سے دلی ہمدردی کا اظہار کرتے ہوئے کہا کہ والدین کا بچھڑ جانا ایک بڑا صدمہ اور ناقابل تلافی نقصان ہے۔ انہوں نے مزید کہا کہ دکھ اور تکلیف کی اس گھڑی میں وہ جنرل عاصم منیر اور ان کے اہل خانہ کے ساتھ ہیں اور دعا گو ہیں کہ اللہ تعالیٰ انہیں صبر عطا فرمائے۔
وفاقی وزیر داخلہ محسن نقوی نے بھی اظہار تعزیت کرتے ہوئے مرحومہ کے درجات کی بلندی اور اہل خانہ کے لیے صبر جمیل کی دعا کی۔
وفاقی وزیر برائے امور کشمیر، گلگت بلتستان و سیفران انجینئر امیر مقام نے کہا کہ والدہ کی رحلت ایک عظیم سانحہ ہے، اللہ تعالیٰ جنرل عاصم منیر اور ان کے خاندان کو صبر عطا فرمائے اور مرحومہ کو جنت الفردوس میں اعلیٰ مقام عطا کرے۔
وزیر اعلیٰ پنجاب مریم نواز شریف نے بھی جنرل سید عاصم منیر کی والدہ کے انتقال پر گہرے رنج و غم کا اظہار کرتے ہوئے سوگوار خاندان سے اظہار تعزیت کیا۔
گورنر سندھ کامران خان ٹیسوری نے بھی آرمی چیف کی والدہ کی وفات پر گہرے دکھ کا اظہار کیا اور دعا کی کہ اللہ تعالیٰ مرحومہ کو جنت الفردوس میں جگہ عطا فرمائے اور پسماندگان کو صبر و ہمت دے۔ انہوں نے مزید کہا کہ وہ اس مشکل وقت میں جنرل عاصم منیر اور ان کے اہل خانہ کے ساتھ ہیں۔
