اسلام آباد ۔ای سی سی اجلاس میں وزارت دفاع کے لیے 430 ملین روپے سمیت دیگر اہم گرانٹس کی منظوری دی گئی ہے
وفاقی وزیر خزانہ سینیٹر محمد اورنگزیب کی زیر صدارت اقتصادی رابطہ کمیٹی (ای سی سی) کا اجلاس منعقد ہوا، جس میں مختلف وزارتوں اور منصوبوں کے لیے گرانٹس کی منظوری دی گئی۔
اجلاس میں وزارت اطلاعات و نشریات کے لیے 2 ارب روپے کی تکنیکی ضمنی گرانٹ منظور کی گئی، جبکہ میڈیا ہاؤسز کے واجب الادا اشتہارات کی ادائیگی کے لیے بھی فنڈز جاری کرنے کا فیصلہ کیا گیا۔
علاوہ ازیں، وزارت دفاع کے لیے 430 ملین روپے کی گرانٹ اور پنجاب میں ایس اے پی اسکیموں کے لیے فنڈز مختص کرنے کی منظوری دی گئی۔
وزیر خزانہ کی سربراہی میں ہونے والے اجلاس میں مزید فیصلے بھی کیے گئے، جن میں:
- جناح میڈیکل کمپلیکس اینڈ ریسرچ سینٹر کے لیے 250 ملین روپے کی منظوری
- 1,000 بستروں پر مشتمل جدید طبی مرکز کے قیام کے لیے حکومتی سرمایہ کاری
- سپریم کورٹ کے احکامات کی روشنی میں آسٹریلوی کمپنی کو 24.556 ملین روپے کی ادائیگی شامل ہے۔
اجلاس میں اسٹیٹ بینک کے لانگ ٹرم فنانسنگ فیسلٹی کو مرحلہ وار ختم کرنے کا فیصلہ بھی کیا گیا، جبکہ ایگزیم بینک کو 330 ارب روپے کا ایل ٹی ایف ایف پورٹ فولیو منتقل کرنے کی منظوری دی گئی۔مزید برآں، اجلاس میں 1 ارب روپے کی تکنیکی ضمنی گرانٹ کی بھی منظوری دے دی گئی۔
