راولپنڈی ۔پی ٹی آئی رہنما عمر ایوب کی عبوری ضمانت عدالت نے مسترد کرتے ہوئے ان کی گرفتاری کا حکم جاری کر دیا۔
انسداد دہشت گردی کی خصوصی عدالت راولپنڈی نے 26 نومبر کو ہونے والے پی ٹی آئی احتجاج اور لانگ مارچ سے متعلق دو مقدمات میں قائد حزب اختلاف عمر ایوب خان کی ضمانت کی درخواستیں مسترد کر دیں۔
عدالت نے دونوں مقدمات میں پولیس کو عمر ایوب کی گرفتاری کی اجازت دے دی، جبکہ 26 نومبر کے احتجاج کے کیسز میں گرفتار 27 کارکنوں کی ضمانتیں منظور کر لی گئیں۔
خصوصی عدالت کے جج امجد علی شاہ نے 24 اور 26 نومبر کے احتجاجی کیسز میں گرفتار ملزمان کی ضمانت درخواستوں کی سماعت کی۔ عمر ایوب خان، جو تھانہ حسن ابدال میں درج دونوں مقدمات میں طلب کیے گئے تھے، عدالت میں پیش نہ ہوئے، جبکہ ان کے وکیل ڈاکٹر بابر اعوان بھی سماعت میں شریک نہیں ہوئے، جس کے باعث ان کی عبوری ضمانتیں خارج کر دی گئیں۔
عدالت نے پی ٹی آئی کی دو خواتین رہنماؤں، صنم جاوید اور مشال یوسفزئی کی عبوری ضمانت میں 22 مارچ تک توسیع کر دی، جبکہ 27 کارکنوں کی ضمانت منظور کرتے ہوئے انہیں 50 ہزار سے ایک لاکھ روپے کے ضمانتی مچلکے جمع کرانے کا حکم دیا۔
