لاہور: پاکستان سپر لیگ (پی ایس ایل) کے آغاز سے قبل پشاور زلمی کے جارحانہ اوپنر صائم ایوب کی لیگ میں شرکت پر سوالیہ نشان لگ گیا۔
گزشتہ روز پشاور زلمی نے اپنے اسکواڈ میں بگ بیش لیگ (BBL) میں شاندار کارکردگی دکھانے والے مچل اوون کو شامل کرتے ہوئے انہیں ریزرو کھلاڑی کے طور پر نامزد کیا، حالانکہ ٹیم میں پہلے ہی صائم ایوب موجود ہیں۔
صائم ایوب کی عدم دستیابی کا خدشہ
مچل اوون کی سلیکشن نے مداحوں کو تجسس میں ڈال دیا ہے کہ آیا بابراعظم کے ساتھ اوپننگ کے لیے صائم ایوب دستیاب ہوں گے یا نہیں۔
گزشتہ سیزن میں بابراعظم اور صائم ایوب کی جوڑی نے کئی اہم مواقع پر شاندار شراکت قائم کرتے ہوئے ٹیم کو کامیابیاں دلائیں، جبکہ صائم ایوب کچھ مواقع پر بالنگ کرتے بھی نظر آئے تھے۔
انجری کے باعث صائم ایوب کی غیر یقینی صورتحال
جنوبی افریقا کے دورے کے دوران صائم ایوب انجری کا شکار ہوکر سہ ملکی سیریز اور آئی سی سی چیمپئنز ٹرافی سے باہر ہوچکے ہیں، جس کے بعد ان کی پی ایس ایل میں شرکت بھی غیر یقینی ہوگئی ہے۔ تاہم، وہ ٹرینر حنیف ملک کی نگرانی میں اپنی فٹنس بہتر بنانے پر کام کر رہے ہیں۔
مچل اوون کی بی بی ایل میں شاندار کارکردگی
دوسری جانب، بی بی ایل 2024-25 میں مچل اوون نے 45.20 کی اوسط اور 203.60 کے اسٹرائیک ریٹ سے 452 رنز بنا کر اپنی شاندار فارم کا مظاہرہ کیا، جس کی بنیاد پر پشاور زلمی نے انہیں ریزرو کھلاڑی کے طور پر منتخب کیا ہے۔
