واشنگٹن۔امریکی صدر ڈونلڈ ٹرمپ نے خبردار کیا ہے کہ اگر یمنی حوثیوں کی جانب سے مزید حملے کیے گئے تو ایران کو اس کے سنگین نتائج بھگتنا پڑیں گے۔ ان کا کہنا تھا کہ آئندہ اگر حوثی کوئی حملہ کرتے ہیں تو اس کی ذمہ داری ایران پر عائد کی جائے گی۔
سوشل میڈیا پر جاری کیے گئے اپنے بیان میں ڈونلڈ ٹرمپ نے کہا کہ “آج کے بعد اگر حوثی ایک گولی بھی چلاتے ہیں تو ہم اسے ایرانی ہتھیار اور ایرانی قیادت کی کارروائی سمجھیں گے۔”
امریکی صدر نے مزید کہا کہ “اب کسی بھی کارروائی کا ذمہ دار ایران ہوگا، جس کے اسے سنگین نتائج بھگتنا ہوں گے۔”
دوسری جانب، امریکی حملوں کے بعد حوثی رہنما عبدالمالک الحوثی کی جانب سے دی گئی کال پر یمن کے مختلف شہروں میں احتجاجی ریلیاں نکالی گئیں، جن میں ہزاروں افراد نے شرکت کی۔
غیر ملکی میڈیا رپورٹس کے مطابق، احتجاجی ریلیوں میں شریک مظاہرین نے فلسطینی پرچم اٹھا رکھے تھے اور فلسطینیوں کے ساتھ اظہار یکجہتی کیا۔ امریکا مخالف احتجاج میں شریک افراد نے امریکا اور اسرائیل کے خلاف نعرے بازی کی اور ہاتھوں میں پلے کارڈز بھی اٹھا رکھے تھے جن پر مختلف نعرے درج تھے۔
