نیو یارک۔سکھوں کی عالمی تنظیم “سکھ فار جسٹس” کے رہنما گرپتونت سنگھ پنوں نے کہا ہے کہ بلوچستان میں ہونے والے ٹرین حملے میں بھارت کی خفیہ ایجنسی “را” کا ہاتھ ہے۔ انہوں نے خبردار کیا کہ اگر بھارت کا محاسبہ نہ کیا گیا تو اگلا حملہ مزید معصوم جانیں لے سکتا ہے۔
امریکہ میں مقیم سکھ رہنما نے اپنے بیان میں کہا کہ بلوچستان میں ٹرین پر حملے کی ذمہ داری بھارت کی مشہور زمانہ ایجنسی “را” پر عائد کی جاتی ہے۔ انہوں نے عالمی اداروں سے مطالبہ کیا کہ وہ بھارت کے قومی سلامتی کے مشیر اجیت ڈوول اور را کے خلاف کارروائی کریں۔ گرپتونت سنگھ پنوں کا کہنا تھا کہ بھارت پاکستان کے خلاف ایک خفیہ جنگی حکمت عملی پر عمل پیرا ہے اور مودی حکومت ایک دہشت گرد حکومت ہے، جو نہ صرف علاقائی بلکہ عالمی امن کے لیے بھی خطرہ بن چکی ہے۔
انہوں نے مزید کہا کہ بھارت عالمی سطح پر پرتشدد کارروائیوں میں ملوث ہے، اور بلوچستان میں ٹرین پر حملہ بھارت کے جارحانہ دفاعی اقدامات کی عکاسی کرتا ہے۔ بھارت کا مقصد اپنے مخالف پڑوسی ممالک کو غیر مستحکم کرنا ہے، اور وہ عالمی سطح پر مخالفین کے قتل، انتہا پسندی اور سرحد پار دہشت گردی میں بھی ملوث ہے۔ گرپتونت سنگھ پنوں نے یہ بھی کہا کہ مودی سرکار نے بھارت کو ریاستی سطح پر دہشت گردی کے عالمی مرکز میں تبدیل کر دیا ہے۔
سکھ رہنما نے یہ بھی کہا کہ را کی کارروائیاں جنوبی ایشیا کے لیے سنگین خطرہ بن چکی ہیں، اور انہوں نے مطالبہ کیا کہ بھارت کے انٹیلیجنس نیٹ ورک پر سفارتی اور سکیورٹی پابندیاں عائد کی جائیں۔ انہوں نے دنیا کو متنبہ کرتے ہوئے کہا کہ بھارت کی خفیہ دہشت گرد کارروائیوں پر آنکھیں بند کرنا اب ممکن نہیں ہے، اور اگر بھارت کا احتساب نہ ہوا تو اگلا حملہ مزید قیمتی جانوں کا ضیاع کر سکتا ہے۔
