اسلام آباد ۔امریکا کے شہر لاس اینجلس کے ایئرپورٹ سے ترکمانستان میں پاکستان کے سفیر احسن واگن کو واپس بھیج دیا گیا ہے۔
اس واقعے کی اطلاع وزیر خارجہ اسحاق ڈار اور سیکرٹری خارجہ آمنہ بلوچ کو دی گئی ہے، جس کے بعد وزارت خارجہ نے لاس اینجلس میں پاکستانی قونصلیٹ کو اس معاملے کی تحقیقات کرنے کی ہدایت کی ہے۔
پاکستانی دفتر خارجہ نے اس پر ردعمل ظاہر کرتے ہوئے کہا کہ “پاکستانی سفیر اپنے نجی دورے پر امریکا گئے ہوئے تھے اور ان کے ساتھ پیش آنے والے واقعے پر وزارت خارجہ تحقیقات کر رہی ہے۔”
میسر معلومات کے مطابق، سفیر کو درست ویزہ اور تمام قانونی سفری دستاویزات کے باوجود امریکا میں داخلے سے روک دیا گیا۔ وہ اپنے ذاتی دورے پر چھٹیاں گزارنے لاس اینجلس جا رہے تھے جب امریکی امیگریشن حکام نے انہیں ایئرپورٹ پر روک لیا۔
امریکی امیگریشن حکام نے ان کا آن لائن ویزہ چیک کیا، جس کے دوران امریکی ویزہ سسٹم میں کچھ متنازعہ ویزہ ریفرنسز پاکستانی سفیر سے جڑے ہوئے تھے، جس کی وجہ سے سسٹم میں الرٹ آ گیا اور انہیں ایئرپورٹ پر روک لیا گیا۔
