واشنگٹن: امریکا نے اپنے شہریوں کے لیے پاکستان میں خاص طور پر خیبر پختونخوا اور بلوچستان کے سفر کے حوالے سے نئی ٹریول ایڈوائزری جاری کی ہے۔
یہ ایڈوائزری امریکی محکمہ خارجہ کے بیورو آف قونصلر افیئرز کی جانب سے جاری کی گئی، جس میں امریکی شہریوں کو پاکستان کے سفر پر دوبارہ غور کرنے کی ہدایت کی گئی ہے۔
ٹریول ایڈوائزری میں کہا گیا ہے کہ امریکی شہری خیبر پختونخوا اور بلوچستان کے سفر سے پرہیز کریں۔ ایڈوائزری میں مزید کہا گیا کہ پاکستان میں انتہا پسند گروہوں کی جانب سے حملوں کی منصوبہ بندی کی جا رہی ہے۔
ایڈوائزری میں امریکی شہریوں کو خبردار کیا گیا ہے کہ بلوچستان اور خیبر پختونخوا میں دہشت گردانہ حملے ایک عام بات بن چکے ہیں، اس لیے ان علاقوں کا سفر کرنے سے اجتناب کیا جائے۔
اس کے علاوہ، ایڈوائزری میں واضح کیا گیا ہے کہ امریکی شہری پاکستان میں بلا اجازت مظاہروں یا احتجاجوں سے دور رہیں، کیونکہ ایسا کرنے پر انہیں قانون نافذ کرنے والے اداروں سے تفتیش کا سامنا ہو سکتا ہے۔
ایڈوائزری میں مزید بتایا گیا ہے کہ پہلے بھی امریکی شہریوں کو پاکستان میں مظاہروں میں حصہ لینے یا پاکستانی حکومت اور فوج کے خلاف مواد پوسٹ کرنے پر حراست میں لیا جا چکا ہے۔
امریکی حکومت نے اپنے شہریوں کو پاکستان میں ممکنہ خطرات سے آگاہ کرتے ہوئے ان سے احتیاطی تدابیر اختیار کرنے کی درخواست کی ہے۔
