متحدہ عرب امارات (یو اے ای) میں دو مزید بھارتی شہریوں کی سزائے موت پر عمل درآمد کر دیا گیا، جس کے بعد خلیجی ممالک میں سزائے موت پانے والے بھارتی شہریوں کی تعداد میں اضافہ ہو گیا ہے۔
بھارتی وزارتِ خارجہ کے مطابق، کیرالا سے تعلق رکھنے والے محمد ریناش ارنگیلوتو اور مرلی دھرن پیرمتھاٹا کی سزائے موت پر عمل درآمد عدالتی فیصلے کو برقرار رکھنے کے بعد کیا گیا۔
دونوں بھارتی شہریوں پر قتل کے مختلف مقدمات میں الزامات ثابت ہونے کے بعد 28 فروری کو سزائے موت دی گئی۔
یہ پہلا موقع نہیں کہ یو اے ای میں بھارتی شہریوں کو سزائے موت دی گئی ہو۔ اس سے قبل 15 فروری کو ابو ظہبی میں 33 سالہ بھارتی خاتون، شہزادی خان کو چار ماہ کے شیر خوار بچے کے قتل کے جرم میں سزائے موت دی گئی تھی۔
خاتون کے اہل خانہ نے دعویٰ کیا تھا کہ انہیں سزائے موت سے متعلق پیشگی اطلاع نہیں دی گئی، جبکہ بھارتی وزارتِ خارجہ نے تصدیق کی کہ یو اے ای نے انہیں 28 فروری کو اس فیصلے سے آگاہ کیا۔
بھارتی حکومت کی جانب سے فراہم کردہ اعداد و شمار کے مطابق، عرب ممالک میں سزائے موت کا سامنا کرنے والے بھارتی شہریوں کی تعداد تشویشناک حد تک بڑھ چکی ہے۔
بھارتی وزیر خارجہ کیرتی وردھن سنگھ نے 13 فروری کو پارلیمنٹ میں انکشاف کیا تھا کہ:
یو اے ای میں 29 بھارتی شہری سزائے موت کے منتظر ہیں۔
سعودی عرب میں 12، کویت میں 3 جبکہ قطر میں 1 بھارتی شہری کو سزائے موت سنائی جا چکی ہے۔
یہ صورتحال بھارت کے لیے ایک سفارتی چیلنج بنتی جا رہی ہے، جبکہ انسانی حقوق کی تنظیمیں بھی ان کیسز پر گہری نظر رکھے ہوئے ہیں۔
