سابق مس ورلڈ اور نامور بھارتی اداکارہ پریانکا چوپڑا کی والدہ، مدھو چوپڑا، نے ماضی کی یادیں تازہ کرتے ہوئے کچھ دلچسپ انکشافات کیے ہیں۔
بھارتی میڈیا کے مطابق، مدھو چوپڑا نے کہا کہ ان کی بیٹی نے وقار اور پیشہ ورانہ صلاحیتوں کے ساتھ اپنا کیریئر خود بنایا، جس پر وہ بے حد فخر محسوس کرتی ہیں۔
مدھو چوپڑا کا کہنا تھا کہ پریانکا نے ہمیشہ اپنی حدود کا خیال رکھا، چاہے وہ کوئی فوٹو شوٹ ہو یا عالمی سطح کا مقابلہ حسن۔
انہوں نے انکشاف کیا کہ جب مس ورلڈ مقابلے کے تیسرے راؤنڈ میں سوئمنگ سوٹ پہننے کو کہا گیا تو پریانکا نے انکار کر دیا تھا۔ ان کا کہنا تھا کہ وہ دو پیس سوٹ میں خود کو آرام دہ محسوس نہیں کریں گی، اور منتظمین نے ان کے فیصلے کا مکمل احترام کیا۔
مزید گفتگو میں مدھو چوپڑا نے بتایا کہ پریانکا کا رول ماڈل سابق مس یونیورس سشمیتا سین تھیں، اور انہی کو دیکھ کر پریانکا نے مقابلہ حسن میں شرکت کا فیصلہ کیا تھا۔
انہوں نے یہ بھی انکشاف کیا کہ پریانکا کو مس انڈیا لارا دتہ نے کافی مدد فراہم کی۔ لارا نے پریانکا کو چادر اوڑھنے، واک کرنے اور خود میک اپ کرنے کے گُر سکھائے تھے۔
دلچسپ بات یہ ہے کہ پریانکا اور لارا دتہ نے 2003 میں اکشے کمار کے ساتھ فلم انداز کے ذریعے بالی وڈ میں قدم رکھا تھا، اور دونوں نے اپنے فلمی سفر کا آغاز ایک ساتھ کیا۔
