اسلا آباد ۔وزیرِ اعظم محمد شہباز شریف نے نوجوانوں کو مارکیٹ اور صنعتوں کی ضروریات کے مطابق تربیت فراہم کرنے کے منصوبے کی منظوری دے دی ہے۔ اس منصوبے کے تحت نوجوانوں کو مختلف شعبوں میں ہنر سکھانے کے لیے مقامی صنعتوں کی ضروریات اور بین الاقوامی افرادی قوت کے اداروں کی کھپت کو مدنظر رکھا جائے گا۔ وزیرِ اعظم خود اس منصوبے پر عمل درآمد کی نگرانی کریں گے اور اس حوالے سے ماہانہ جائزہ اجلاس کی صدارت کریں گے۔
انہوں نے ہدایت دی کہ مقامی صنعتوں کی ہنر کی ضروریات کے بارے میں جامع ڈیٹا بیس قائم کیا جائے تاکہ تربیتی پروگرامز کو ان ضروریات کے مطابق ترتیب دیا جا سکے۔ وزیرِ اعظم نے کہا کہ پاکستان کے نوجوان ملک کا سب سے قیمتی اثاثہ ہیں، اور ان کو پیشہ ورانہ تربیت فراہم کر کے بر سر روزگار اور خود مختار بنانا ہے۔ پاکستانی نوجوانوں کو بین الاقوامی معیار کی تربیت فراہم کرنے سے افرادی قوت کی برآمد کو فروغ دینے کے لیے اقدامات کیے جا رہے ہیں۔
قبل ازیں وزیرِ اعظم کی زیرِ صدارت نیشنل یوتھ ایمپلائمنٹ پلان پر جائزہ اجلاس ہوا، جس میں وزیرِ اعظم کو بتایا گیا کہ آئندہ 4 برسوں میں مختلف اداروں کے ذریعے 24 لاکھ سے 60 لاکھ نوجوانوں کو تربیت اور روزگار کے مواقع فراہم کیے جائیں گے۔ اس منصوبے کے تحت مارکیٹ اور صنعتوں کی ضروریات کو مدنظر رکھتے ہوئے نوجوانوں کو ہنر کی فراہمی کی جائے گی۔
اجلاس میں وزیرِ اعظم کو یہ بھی بتایا گیا کہ ڈیجیٹل یوتھ حب حتمی مراحل میں ہے اور اس کا اجراء رواں ماہ کر دیا جائے گا۔ وزیرِ اعظم نے اس حوالے سے تمام وزارتوں اور اداروں کی کاوشوں کی تعریف کی۔
اجلاس میں وفاقی وزراء احد خان چیمہ، شزہ فاطمہ خواجہ، چیئرمین وزیرِ اعظم یوتھ پروگرام رانا مشہود احمد خان، چیئرمین ہائر ایجوکیشن کمیشن ڈاکٹر مختار احمد اور دیگر متعلقہ اعلی حکام نے شرکت کی۔
