تاشقند۔وزیرِ اعظم شہباز شریف ازبکستان کے صدر عزت مآب شوکت مرزیایوف سے ملاقات کے لیے تاشقند کے کانگریس سینٹر پہنچے، جہاں وزیرِ اعظم کو گارڈ آف آنر پیش کیا گیا۔
تاشقند کانگریس سینٹر پہنچنے پر وزیرِ اعظم اور ازبک صدر کے درمیان دوستانہ گفتگو ہوئی۔ اس موقع پر دونوں ممالک کے قومی ترانے بھی بجائے گئے۔
ازبک صدر نے وزیرِ اعظم پاکستان کو اپنی کابینہ کے ارکان سے متعارف کرایا، جس کے بعد وزیرِ اعظم نے اپنے کابینہ کے ارکان کا تعارف کرایا۔
اس کے بعد وزیرِ اعظم اور ازبک صدر پاکستان اور ازبکستان کے مابین مختلف شعبوں میں تعاون سے متعلق مفاہمتی یادداشتوں اور معاہدوں پر دستخط کی تقریب میں شریک ہوں گے، اور دونوں رہنماؤں مشترکہ پریس کانفرنس میں خطاب کریں گے۔
دونوں رہنماؤں کے درمیان دوطرفہ ملاقات اور وفود کی سطح پر ملاقاتیں بھی ہوں گی۔
اس کے بعد وزیرِ اعظم اور ازبک صدر پاکستان اور ازبکستان کے مشترکہ بزنس فورم میں شرکت کریں گے اور اس فورم میں گفتگو کریں گے۔
وزیرِ اعظم تاشقند میں واقع ٹیکنو پارک کا دورہ بھی کریں گے، جہاں انہیں ازبکستان کی مقامی سطح پر تیار کردہ مصنوعات کے صنعتی یونٹس کا معائنہ کرایا جائے گا۔
