بیجنگ: چین میں ایک نیا بیٹ کورونا وائرس دریافت ہوا ہے جو انسانوں کو متاثر کرنے کی صلاحیت رکھتا ہے۔
یہ وائرس HKU5-CoV-2 کہلاتا ہے اور مرکووائرس (merbecovirus) سبجینس سے تعلق رکھتا ہے، جس میں وہ وائرس بھی شامل ہے جو مشرق وسطیٰ کے تنفسی سنڈروم (MERS) کا سبب بنتا ہے۔
یہ وائرس انسانی خلیوں میں داخل ہونے کے لیے ACE2 ریسیپٹرز کا استعمال کرتا ہے، بالکل اسی طرح جیسے COVID-19 کا باعث بننے والا SARS-CoV-2 وائرس انسانی خلیوں میں داخل ہوتا ہے۔
چینی محققین نے تجربہ گاہ میں منی-ہیومن آرگن ماڈلز پر اس وائرس کا تجربہ کیا، جس سے یہ ثابت ہوا کہ یہ وائرس انسانی خلیوں کو متاثر کر سکتا ہے۔
اس تحقیق کے بعد اس وائرس کو لے کر خدشات پیدا ہوئے ہیں کہ یہ عالمی وبا کا سبب بن سکتا ہے۔ تاہم، امریکی ماہر ڈاکٹر مائیکل اوسٹرہوم نے کہا کہ اس وائرس کے حوالے سے پریشانی کی بات نہیں ہے، کیونکہ 2019 کے مقابلے میں اب انسانوں میں SARS وائرس کے خلاف زیادہ مدافعت موجود ہے۔
تحقیق میں یہ بھی بتایا گیا کہ یہ وائرس SARS-CoV-2 کے مقابلے میں انسانی خلیوں کے ساتھ کمزور تعلق رکھتا ہے، اس لیے اس کے فوری طور پر انسانوں میں پھیلنے کا امکان کم ہے۔
چینی سائنسدانوں کے مطابق، بیٹ مرکووائرس وائرسز میں انسانوں میں منتقل ہونے کی صلاحیت ہوتی ہے، لیکن اس وائرس کے حوالے سے مزید تحقیق کی ضرورت ہے۔ تاہم، یہ ابھی تک واضح نہیں کہ آیا یہ وائرس انسانوں میں بیماری پھیلانے کا سبب بنے گا یا نہیں۔
