کراچی۔نیشنل اسٹیڈیم کراچی میں کھیلے گئے آئی سی سی چیمپئنز ٹرافی کے تیسرے میچ میں جنوبی افریقا نے افغانستان کو 107 رنز سے شکست دے دی۔
316 رنز کے تعاقب میں افغانستان کی ٹیم 44ویں اوور میں 208 رنز پر ڈھیر ہوگئی۔ افغانستان کی جانب سے رحمت شاہ 90 رنز کے ساتھ نمایاں رہے، جبکہ راشد خان اور عظمت اللہ عمر زئی 18، 18 رنز بنا سکے۔ دیگر کھلاڑیوں میں ابراہیم زادران 17، صدیق اللہ اٹل 16، گلبدین نائب 13، رحمان اللہ گربز 10، نور احمد 9، محمد نبی 8 اور کپتان حشمت اللہ شاہدی بغیر کوئی رن بنائے آؤٹ ہوئے۔
پروٹیز کی جانب سے کیگیسو رباڈا نے 3 وکٹیں حاصل کیں، جبکہ وائین مُلڈر اور لُنگی اینگیڈی نے 2، 2 کھلاڑیوں کو آؤٹ کیا۔ مارکو جینسن اور کیشو مہاراج نے 1، 1 وکٹ اپنے نام کی۔
اس سے قبل جنوبی افریقا نے ٹاس جیت کر پہلے بیٹنگ کا فیصلہ کیا اور مقررہ 50 اوورز میں 6 وکٹوں کے نقصان پر 315 رنز بنائے۔ اوپنر رائن رکلٹن نے شاندار 103 رنز اسکور کیے، جبکہ کپتان ٹیمبا بووما نے 58 رنز کی اننگز کھیلی۔ راسی وان ڈیر ڈوسن 52، ایڈن مارکرم 52 اور ڈیوڈ ملر 14 رنز بنا سکے۔ ویان ملڈر 12 رنز کے ساتھ ناٹ آؤٹ رہے، جبکہ مارکو جینسن صفر پر آؤٹ ہوئے۔
افغانستان کی جانب سے محمد نبی نے 2 وکٹیں حاصل کیں، جبکہ فضل حق فاروقی، عظمت اللہ عمر زئی اور نور احمد نے 1، 1 کھلاڑی کو آؤٹ کیا۔
