اسلام آباد۔اپوزیشن جماعتوں نے حکومت مخالف اتحاد کو مزید وسعت دینے کا فیصلہ کیا ہے، اور اس حوالے سے گرینڈ اپوزیشن الائنس کے لیے اہم روابط اور ملاقاتیں جاری ہیں۔
تحریک تحفظ آئین پاکستان کی قیادت آج سندھ روانہ ہوگی، جہاں تین روزہ دورے کے دوران گرینڈ الائنس کے قیام کے لیے اہم ملاقاتیں کی جائیں گی۔
اپوزیشن اتحاد جی ڈی اے کی قیادت سے ملاقات کرے گا، جبکہ اپوزیشن رہنما حیدرآباد میں جئے سندھ کے سربراہ ایاز لطیف پلیجو سے بھی ملاقات کریں گے۔
اپوزیشن اتحاد کے وفد میں محمود اچکزئی، اسد قیصر، صاحبزادہ حامد رضا، اخونزادہ حسین، بی این پی مینگل اور ایم ڈبلیو ایم کے رہنما شامل ہوں گے، جبکہ پاکستان تحریک انصاف کے سیکریٹری جنرل سلمان اکرم راجہ بھی وفد کا حصہ ہوں گے۔
سندھ کے تین روزہ دورے کے دوران اپوزیشن الائنس کے وفد کی بزنس کمیونٹی اور بار ایسوسی ایشن سے ملاقاتیں شیڈول ہیں، جبکہ پی ٹی آئی کراچی کے عہدیداروں سے بھی ملاقاتیں طے کی گئی ہیں۔ اس کے علاوہ، اپوزیشن رہنما صحافی برادری سے بھی ملاقات کریں گے۔
