اسلام آباد:وزیراعظم شہباز شریف نے کہا ہے کہ نہتے شہریوں کو نشانہ بنانے والے دہشت گردوں کو انتہائی سخت قیمت چکانی ہوگی۔
بلوچستان کے شہر بارکھان میں دہشت گردوں کی بس پر فائرنگ کے نتیجے میں بے گناہ مسافروں کی ہلاکت پر افسوس کا اظہار کرتے ہوئے وزیراعظم نے جاں بحق افراد کے لیے دعائے مغفرت کی اور ان کے لواحقین کے لیے صبر کی دعا کی۔
وزیراعظم نے مجرموں کو جلد از جلد سزا دینے کی ہدایت دیتے ہوئے کہا کہ معصوم شہریوں کی جان و مال کو نقصان پہنچانے والوں کو بھاری قیمت چکانی پڑے گی، اور ان کی قربانیاں ضائع نہیں جائیں گی۔ انہوں نے کہا کہ حکومت اور سکیورٹی فورسز دہشت گردی کا مکمل خاتمہ کرنے کے لیے مسلسل سرگرم ہیں۔
صدر مملکت آصف علی زرداری نے بارکھان میں مسافروں کی ہلاکت کی شدید مذمت کرتے ہوئے کہا کہ بے گناہ افراد کا قتل ایک بزدلانہ اور گھناو¿نا فعل ہے۔ انہوں نے کہا کہ دہشت گرد عناصر بلوچستان کے امن کو خراب کرنے کی کوشش کر رہے ہیں اور انہیں جلد قانون کے کٹہرے میں لایا جائے گا۔صدر مملکت نے جاں بحق افراد کے درجات کی بلندی کے لیے دعا کی اور ان کے اہل خانہ سے دلی تعزیت کا اظہار کیا۔
