اسلام آباد۔اپوزیشن جماعتوں کے حکومت مخالف اتحاد کو مزید وسعت دینے کے فیصلے اور پی ٹی آئی وفد کی چیف جسٹس پاکستان سے ملاقات کے بعد صدر مملکت آصف علی زرداری اور وزیر اعظم شہباز شریف کے درمیان اہم ملاقات کا امکان ہے، جس میں ملک کی سیاسی صورتحال پر تبادلہ خیال کیا جائے گا۔
رپورٹ کے مطابق، صدر آصف علی زرداری آج دو روزہ دورے پر لاہور پہنچیں گے، جہاں وہ مختلف سیاسی رہنماؤں سے ملاقاتیں کریں گے اور ڈربی ریس میں بھی شرکت کریں گے۔
یہ بھی پڑھیں: اپوزیشن جماعتوں کا حکومت مخالف اتحاد مزید وسیع کرنے کا فیصلہ
ذرائع کے مطابق، لاہور میں قیام کے دوران صدر آصف علی زرداری کی وزیر اعظم شہباز شریف سے ملاقات متوقع ہے۔ اس ملاقات میں حکمران اتحادیوں کے درمیان پاور شیئرنگ فارمولے سمیت دیگر سیاسی امور پر گفتگو کی جائے گی۔
مزید پڑھیں: پی ٹی آئی وفد نے چیف جسٹس سے ملاقات میں عمران خان سمیت دیگر درپیش مسائل اجاگر کیے، اعلامیہ
ذرائع کا کہنا ہے کہ صدر آصف علی زرداری گورنر ہاؤس میں گورنر پنجاب سردار سلیم حیدر سے بھی صوبے کی مجموعی صورتحال پر تبادلہ خیال کریں گے۔ اس کے علاوہ، وہ جنوبی پنجاب کے صدر اور سابق گورنر مخدوم احمد محمود کے گھر بھی جائیں گے۔
ذرائع کے مطابق، صدر مملکت اتوار کے روز لاہور ریس کلب میں ہونے والی ڈربی ریس میں بطور مہمان خصوصی شرکت کریں گے۔
