آئی سی سی چیمپئنز ٹرافی 2025 کی آمد قریب ہے، اور اس موقع پر ہم ان پانچ بلے بازوں پر ایک نظر ڈالتے ہیں جو اپنی شاندار بیٹنگ سے اس ٹورنامنٹ کو یادگار بنا سکتے ہیں۔
آئی سی سی کے مطابق، چیمپئنز ٹرافی 2025 میں یہ پانچ کھلاڑی اپنے بہترین کھیل سے سب کی توجہ کا مرکز بننے والے ہیں۔
فخر زمان (پاکستان)
میچز: 85، رنز: 3627، اوسط: 46.50، بہترین اسکور: 210*، سنچریاں: 11، نصف سنچریاں: 17
پاکستان کے ممتاز اوپنر فخر زمان اپنی جارحانہ بیٹنگ سے میچ کا پانسہ پلٹنے کی صلاحیت رکھتے ہیں۔ 2017 کے چیمپئنز ٹرافی کے فائنل میں بھارت کے خلاف ان کی شاندار 114 رنز کی اننگز ابھی تک یادگار ہے۔ حالیہ ٹرائی نیشن سیریز میں شاندار واپسی کے بعد، فخر ایک بار پھر پاکستان کی امیدوں کا مرکز بننے جا رہے ہیں۔
ڈیرل مچل (نیوزی لینڈ)
میچز: 45، رنز: 1765، اوسط: 50.42، بہترین اسکور: 134، سنچریاں: 6، نصف سنچریاں: 7
نیوزی لینڈ کے مڈل آرڈر بلے باز ڈیرل مچل ایشیائی کنڈیشنز میں اپنی شاندار کارکردگی کے لیے مشہور ہیں۔ ورلڈ کپ 2023 میں ان کی 552 رنز کی پرفارمنس اور حالیہ ٹرائی نیشن سیریز میں پاکستان کے خلاف دو نصف سنچریاں اس بات کی دلیل ہیں کہ مچل اور کین ولیمزن نیوزی لینڈ کی بیٹنگ لائن کے اہم ستون ہوں گے۔
ہینرک کلاسن (جنوبی افریقا)
میچز: 58، رنز: 2074، اوسط: 44.12، بہترین اسکور: 174، سنچریاں: 4، نصف سنچریاں: 10
جنوبی افریقا کے طاقتور بیٹر ہینرک کلاسن اپنی تیز رفتار بیٹنگ کے لیے جانے جاتے ہیں۔ وہ مخالف ٹیموں کے لیے خوف کا باعث بن چکے ہیں اور اسپنرز کے خلاف بہترین کھیل کا مظاہرہ کرتے ہیں۔
شریاس ایر (بھارت)
میچز: 65، رنز: 2602، اوسط: 48.18، بہترین اسکور: 128، سنچریاں: 5، نصف سنچریاں: 20
بھارتی مڈل آرڈر بلے باز شریاس ایر نے انگلینڈ کے خلاف حالیہ سیریز میں عمدہ کارکردگی کا مظاہرہ کیا۔ روہت شرما اور ویرات کوہلی کی حالیہ کارکردگی میں کمی کے باعث شریاس کی موجودگی بھارتی بیٹنگ کے لیے اہم ثابت ہو سکتی ہے۔
بین ڈکٹ (انگلینڈ)
میچز: 19، رنز: 831، اوسط: 46.16، بہترین اسکور: 107، سنچریاں: 2، نصف سنچریاں: 6
انگلینڈ کے اوپنر بین ڈکٹ اپنی جارحانہ بیٹنگ کے لیے معروف ہیں اور فل سالٹ کے ساتھ ایک خطرناک اوپننگ جوڑی بناتے ہیں۔ چیمپئنز ٹرافی میں انگلینڈ کی کامیابی کے لیے ان کی طرف سے لمبی اننگز کھیلنا اہم ہوگا۔
یہ پانچ کھلاڑی 2025 کی چیمپئنز ٹرافی میں اپنے کھیل کے ذریعے شائقین کے دل جیتنے والے ہیں۔
