پاکستان کرکٹ ٹیم کے سابق کپتان بابر اعظم نے نیوزی لینڈ کے خلاف سہ ملکی سیریز میں تیز ترین 6 ہزار رنز مکمل کرنے کا اعزاز حاصل کرلیا۔
نیشنل اسٹیڈیم کراچی میں کھیلے گئے فائنل میچ کے دوران، بابر اعظم نے 10 رنز مکمل کرتے ہی ون ڈے فارمیٹ میں پاکستان کے لیے تیز ترین 6 ہزار رنز بنانے کا ریکارڈ اپنے نام کیا۔
بابر نے یہ کارنامہ 125 ون ڈے انٹرنیشنل میچز میں انجام دیا، جہاں وہ 55.98 کی اوسط سے 5,990 رنز بنا چکے تھے۔
پاکستان کے 6 ہزار رنز بنانے والے کھلاڑی
بابر اعظم ون ڈے کرکٹ میں 6 ہزار رنز بنانے والے 11ویں پاکستانی کھلاڑی بن گئے ہیں۔ اس فہرست میں سرفہرست انضمام الحق ہیں، جنہوں نے 11,701 رنز بنائے، جبکہ محمد یوسف (9,554) اور سعید انور (8,824) بالترتیب دوسرے اور تیسرے نمبر پر ہیں۔
ہاشم آملہ کے ریکارڈ کی برابری
بابر اعظم نے یہ سنگ میل عبور کرکے جنوبی افریقہ کے لیجنڈری بیٹر ہاشم آملہ کے ون ڈے میں تیز ترین 6 ہزار رنز بنانے کے عالمی ریکارڈ کی بھی برابری کرلی، جو انہوں نے 125 اننگز میں مکمل کیا تھا۔
یہ کامیابی ایک بار پھر بابر اعظم کی شاندار فارم اور مستقل مزاجی کا ثبوت ہے، جو انہیں دنیائے کرکٹ کے بہترین بلے بازوں میں شامل کرتی ہے۔
