بلومبرگ کے تجزیہ کار مارک گرمن کے مطابق، ایپل آئندہ ہفتے اپنی فلیگ شپ ڈیوائس آئی فون ایس ای 4 متعارف کرانے جا رہا ہے۔
بدھ کے روز کی گئی اپنی ایک ٹویٹ میں گرمن نے اشارہ دیا کہ نیا آئی فون ایس ای 4 جلد ہی پیش کیا جائے گا، اور توقع ہے کہ آئندہ ہفتے ایپل کی بریفنگ کے دوران اس کا باضابطہ اعلان کر دیا جائے گا۔ انہوں نے مزید بتایا کہ جمعرات کو کمپنی کی جانب سے ایک مختصر اعلان کیا جائے گا، جبکہ جمعے کو ایپل ویژن پرو کے نمائندے ایک اہم اعلان سے متعلق پریس کانفرنس کریں گے۔
دلچسپ پہلو یہ ہے کہ گرمن نے آئی فون ایس ای 4 کے لیے کسی مخصوص لانچ ایونٹ کا ذکر نہیں کیا، جس سے امکان ہے کہ ایپل اس ڈیوائس کا اعلان پریس ریلیز کے ذریعے کرے گا۔
آئی فون ایس ای 4 کے بارے میں کافی عرصے سے یہ خبریں گردش کر رہی ہیں کہ یہ آئی فون 14 سے مشابہ ہوگا۔ متوقع خصوصیات میں شامل ہیں:
🔹 6.06 انچ ایف ایچ ڈی+ ایل ٹی پی ایس او ایل ای ڈی ڈسپلے، 60 ہرٹز ریفریش ریٹ کے ساتھ
🔹 چہرے کی شناخت (فیس آئی ڈی) کے لیے نوچ اور فرنٹ کیمرا
🔹 اے 18 چپ، 8 جی بی ریم
🔹 48 میگا پکسل کا بیک کیمرا اور 12 میگا پکسل سیلفی کیمرا
یہ دیکھنا دلچسپ ہوگا کہ ایپل اس بجٹ فلیگ شپ فون کو کس قیمت پر متعارف کراتا ہے اور صارفین کو کیا نئی خصوصیات فراہم کرتا ہے۔
