حکومت نے مہنگائی کے تازہ ترین اعداد و شمار جاری کر دیے، جن کے مطابق 13 اشیا کی قیمتوں میں مزید اضافہ ریکارڈ کیا گیا ہے۔
وفاقی ادارہ شماریات کے مطابق، ملک میں ہفتہ وار بنیادوں پر مہنگائی کی شرح میں معمولی کمی ہوئی ہے، جبکہ سالانہ بنیادوں پر مہنگائی میں 0.98 فیصد اضافہ دیکھا گیا۔ گزشتہ ایک ہفتے کے دوران مہنگائی کی شرح میں 0.04 فیصد کمی بھی ریکارڈ کی گئی۔
تازہ اعداد و شمار کے مطابق، گزشتہ ہفتے کے دوران 13 اشیا کی قیمتوں میں اضافہ ہوا، 15 اشیا سستی ہوئیں، جبکہ 23 مصنوعات کی قیمتوں میں استحکام رہا۔ رپورٹ کے مطابق، ایک ہفتے کے دوران کیلے فی درجن 12 روپے 96 پیسے مہنگے ہوئے، جبکہ چکن کی قیمت میں فی کلو 15 روپے 45 پیسے کا اضافہ دیکھا گیا۔
مزید برآں، انڈے فی درجن 5 روپے 85 پیسے مہنگے ہوئے، جبکہ لہسن کی فی کلو قیمت میں 9 روپے 77 پیسے کا اضافہ ریکارڈ کیا گیا۔ اسی طرح چینی کی قیمت میں فی کلو 1 روپے 16 پیسے کا اضافہ ہوا۔
ادارہ شماریات کے مطابق، مٹن، بیف، دودھ، دہی اور دال ماش بھی مہنگائی کی زد میں آنے والی اشیا میں شامل ہیں۔
دوسری جانب، ہفتہ وار بنیادوں پر ٹماٹر کی قیمت میں فی کلو 5 روپے 42 پیسے کمی ہوئی۔ اسی طرح، پیاز فی کلو 3 روپے 63 پیسے، 190 گرام چائے کا پیکٹ 24 روپے 26 پیسے، اور دال چنا 6 روپے 48 پیسے سستی ہوئیں۔ علاوہ ازیں، ایل پی جی، آٹا، گڑ، اور جلانے کی لکڑی بھی سستی ہونے والی اشیا میں شامل ہیں۔
رپورٹ میں مزید بتایا گیا کہ بریڈ، سگریٹ، ماچس اور کپڑوں سمیت 23 اشیا کی قیمتیں مستحکم رہیں۔
