بیجنگ۔چین نے امریکی صدر ڈونلڈ ٹرمپ کے اس منصوبے کو مسترد کردیا، جس کے تحت فلسطینیوں کو غزہ سے زبردستی بےدخل کرکے کسی اور ملک میں بسایا جانا تھا۔
عالمی میڈیا کے مطابق، چین کی وزارت خارجہ کی پریس بریفنگ میں جب ایک صحافی نے اس پالیسی پر سوال کیا تو ترجمان گو جیاکون نے واضح الفاظ میں کہا کہ غزہ فلسطینیوں کی سرزمین ہے اور انہیں وہاں سے بےدخل کرنے کی کوئی حمایت نہیں کی جا سکتی۔
چینی ترجمان نے مزید کہا کہ چین فلسطینی عوام کی جبری نقل مکانی کے سخت خلاف ہے اور اس کی مخالفت کرتا رہے گا۔
واضح رہے کہ اس منصوبے کو فلسطینی قیادت، حماس، عرب ممالک، اقوام متحدہ اور دیگر عالمی قوتیں بھی رد کر چکی ہیں۔
رواں ماہ کے آغاز میں امریکی صدر نے اسرائیلی وزیراعظم بنیامین نیتن یاہو سے ملاقات کے بعد پریس کانفرنس میں یہ منصوبہ پیش کیا تھا، جس کے تحت غزہ کی تعمیر نو کے بدلے فلسطینیوں کو دیگر ممالک، خصوصاً مصر اور اردن میں بسایا جانا تھا۔
