انجری کا شکار ہونے والے تجربہ کار حارث رؤف کی غیر موجودگی میں نوجوان فاسٹ بولر عاکف جاوید کو پاکستان اسکواڈ میں شامل کر لیا گیا ہے۔
ذرائع کے مطابق، خیبر پختونخوا سے تعلق رکھنے والے 24 سالہ آل راؤنڈر عاکف جاوید سہ فریقی ون ڈے سیریز کے اگلے دونوں میچز میں قومی ٹیم کا حصہ ہوں گے۔
نیشنل اسٹیڈیم میں جنوبی افریقہ کے خلاف ہونے والے میچ میں ان کی شمولیت کا حتمی فیصلہ ٹیم مینجمنٹ کرے گی۔
چھ فٹ ایک انچ قامت کے حامل عاکف جاوید نے بنگلہ دیش پریمیئر لیگ میں شاندار کارکردگی دکھا کر سلیکٹرز کی توجہ حاصل کی۔ 2019 میں فرسٹ کلاس ڈیبیو کرنے والے عاکف قائدِاعظم ٹرافی میں بلوچستان اسکواڈ کا حصہ بنے تھے۔
رائٹ ہینڈ بیٹسمین اور لیفٹ آرم فاسٹ بولر عاکف جاوید نے اسی سال قومی ٹی ٹوئنٹی کپ میں بھی شرکت کی، جبکہ 2020 میں پی ایس ایل میں اسلام آباد یونائیٹڈ کی نمائندگی کی تھی۔ اگلے برس، وہ سری لنکا ٹور کے لیے پاکستان شاہینز کا بھی حصہ رہے۔
عاکف کو لاہور قلندرز اور کراچی کنگز کی جانب سے کھیلنے کا اعزاز حاصل ہے۔ اگر انہیں سہ فریقی ون ڈے سیریز میں موقع دیا گیا تو وہ اپنا پہلا ون ڈے انٹرنیشنل کھیلنے کا خواب بھی پورا کر سکتے ہیں۔
