کوالالمپور۔ملائیشیا میں جاری آئی سی سی ویمنز انڈر 19 ٹی 20 ورلڈ کپ کے میچ میں نائجیریا نے نیوزی لینڈ کو شکست دے کر تاریخ رقم کی۔
پیر کو بارش سے متاثرہ میچ میں نائیجیریا نے نیوزی لینڈ کے خلاف دو رنز سے کامیابی حاصل کی، جس نے سب کو حیران کن کر دیا۔ نائجیریا کی ٹیم نے پہلے بیٹنگ کرتے ہوئے 13 اوورز میں 6 وکٹوں کے نقصان پر 65 رنز بنائے اور نیوزی لینڈ کو جیت کے لیے 66 رنز کا ہدف دیا۔
ہدف کے تعاقب میں نیوزی لینڈ کی ٹیم 13 اوورز میں 6 وکٹوں کے نقصان پر 63 رنز ہی بنا سکی۔ آخری اوور میں نیوزی لینڈ کو جیت کے لیے 9 رنز درکار تھے، تاہم نائجیریا کی بولر للیان اُدے کی نپی تلی بولنگ نے اپنی ٹیم کو دو رنز سے تاریخی فتح دلائی۔
یہ فتح نائیجیریا کے لیے خاص طور پر اہم ہے کیونکہ یہ ان کے ویمن انڈر 19 ورلڈ کپ کی تاریخ میں پہلی کامیابی ہے۔ نائیجیریا مغربی افریقہ کا پہلا نمائندہ ملک بن گیا ہے جس نے آئی سی سی کے مکمل رکن ملک کو شکست دی۔
نائیجیریا کی ٹیم اس سال پہلی بار انڈر 19 ویمنز ٹی 20 ورلڈ کپ کے لیے کوالیفائی کرنے کے بعد ٹورنامنٹ میں پہنچی تھی۔
