نئی دہلی ۔بھارتی فاسٹ بولر محمد سراج نے چیمپئنز ٹرافی اور انگلینڈ کے خلاف سیریز میں ون ڈے ٹیم سے ڈراپ ہونے کے بعد بڑا فیصلہ کر لیا ہے۔
ٹائمز آف انڈیا کے مطابق، محمد سراج ورک لوڈ مینجمنٹ کی وجہ سے 23 جنوری کو رانجی ٹرافی میں ہماچل پردیش کے خلاف میچ نہیں کھیلیں گے۔ تاہم، وہ ودربھ کے خلاف سیزن کے آخری میچ کے لیے دستیاب ہوں گے، کیونکہ محمد سراج حیدرآباد کی نمائندگی کرتے ہیں۔
یاد رہے کہ بھارتی سلیکٹرز نے چیمپئنز ٹرافی کے لیے محمد سراج کی جگہ ارشدیپ سنگھ کو ٹیم میں شامل کیا تھا۔ بھارتی کپتان روہت شرما نے کہا تھا کہ سراج پرانی گیند سے بولنگ نہیں کرپاتے، اور ٹیم کو ایک ایسے بولر کی ضرورت تھی جو درمیانی اور آخری اوورز میں نئی گیند سے بولنگ کر سکے۔
روہت شرما نے مزید کہا کہ جب سراج کو نئی گیند نہیں دی جاتی تو وہ اپنا اثر کھو دیتے ہیں، اور یہ بدقسمتی کی بات ہے کہ انہیں ٹیم میں شامل نہیں کیا گیا۔ تاہم، ٹیم میں ورائٹی دینے والے دیگر بولرز کی ضرورت تھی، اور انہوں نے کہا کہ ہمارے پاس ایسے بولرز ہیں جو نئی گیند سے بولنگ کر سکتے ہیں، درمیانی اوورز میں بھی گیند کر سکتے ہیں، اور ڈیتھ اوورز میں بھی بہترین پرفارم کر سکتے ہیں۔
محمد سراج نے حال ہی میں آسٹریلیا کے خلاف پانچوں ٹیسٹ میچز میں شاندار پرفارمنس دیتے ہوئے 20 وکٹیں حاصل کی تھیں۔
