لاہور۔کالعدم تنظیم فتنۃ الخوارج کی جانب سے پنجاب میں نوجوانوں کو آن لائن بھرتی کرنے کی مہم کا انکشاف ہوا ہے۔
قانون نافذ کرنے والے اداروں نے بروقت کارروائی کرتے ہوئے تنظیم کے ایک بڑے نیٹ ورک کو بے نقاب کیا ہے۔ اس حوالے سے تیار کی گئی تفصیلی رپورٹ وزیر اعلیٰ پنجاب کو ارسال کر دی گئی ہے۔
رپورٹ میں بتایا گیا ہے کہ دہشت گرد تنظیم نے گجرانوالہ، لاہور، ساہیوال، بہاولپور، جہلم، اور سرگودھا کے علاقوں سے نوجوانوں کو بھرتی کیا، جن کا مقصد صوبے میں مقامی سہولت کاری فراہم کرنا تھا۔
وزیر اعلیٰ کو پیش کی گئی رپورٹ کے مطابق سائبر پٹرولنگ اور انٹیلی جنس معلومات کی بنیاد پر تنظیم کی آن لائن بھرتی مہم کو ناکام بنایا گیا ہے۔ کارروائی کے دوران 16 سے 23 سال کی عمر کے 6 افراد کو گرفتار کیا گیا، جنہوں نے تنظیم کے لیے سہولت کاری فراہم کرنے کا اعتراف کیا۔
سائبر پٹرولنگ کے عمل کو مزید تیز کر دیا گیا ہے اور ریاست مخالف عناصر کی مانیٹرنگ کے لیے جدید الگورتھم کی نشاندہی کی جا رہی ہے۔ حکام کے مطابق سوشل میڈیا صارفین تک رسائی کرنے والے نیٹ ورکس پر خصوصی نظر رکھی جا رہی ہے تاکہ مستقبل میں ایسے اقدامات کو روکا جا سکے۔
