اسلام آباد ۔وزیر دفاع خواجہ آصف نے کہا ہے کہ ملک میں بدعنوانی اپنی انتہا کو پہنچ چکی ہے اور اگر اس کا 50 فیصد بھی خاتمہ ہو جائے تو ہمیں آئی ایم ایف کی ضرورت نہیں رہے گی اور ہمارا ملک ترقی کی جانب گامزن ہو جائے گا۔
سیالکوٹ میں ایوان صنعت و تجارت میں تاجروں سے خطاب کرتے ہوئے خواجہ آصف نے کہا کہ ملک گزشتہ ایک سال سے آئی ایم ایف کے دباؤ کا سامنا کر رہا ہے، لیکن اصل ضرورت ملک کے اندر استحکام کی ہے۔ انہوں نے بتایا کہ پالیسی ریٹ میں نو فیصد کمی سے حالات بہتر ہونے کی توقع ہے۔
خواجہ آصف نے کہا کہ ہمارے خطے میں پیدا ہونے والے مسائل کے اثرات ہماری معیشت پر بھی پڑتے ہیں۔
انہوں نے مزید کہا کہ ایوان صنعت و تجارت کے مسائل سے آگاہ ہوں، لیکن سیالکوٹ شہر کی ثقافت منفرد ہے۔ یہاں نجی شراکت داری کے ذریعے ایئرپورٹ اور ایئرلائن کا قیام ایک مثال ہے جو دنیا میں کہیں اور نہیں ملتی۔
انہوں نے بتایا کہ پچھلے تین سے چار ماہ کے دوران انہیں پورٹ شپ کی ٹاسک فورس کا سربراہ مقرر کیا گیا ہے۔ ایک کنٹینر کو آپریٹ کرنے کے لیے چھ گھنٹے درکار ہوتے ہیں، اور گاڑیوں سے ٹریکر ہٹا کر دوسری گاڑیوں پر لگائے جاتے ہیں۔
وزیر دفاع نے خوشخبری دیتے ہوئے کہا کہ وزیر ہوا بازی نے پاکستانی ایئر لائنز کے لیے اچھی خبر سنائی ہے۔ نئے سال کے آغاز سے ایئر سیال، ایئر بلیو اور فلائی جناح کو دبئی کے تمام ایئرپورٹس پر لینڈنگ کی اجازت مل جائے گی۔
