مظفرآباد: آزاد کشمیر حکومت اور عوامی ایکشن کمیٹی کے درمیان کامیاب مذاکرات کے بعد ایک معاہدہ طے پا گیا، جس کے تحت 23 جنوری کو ہونے والے لانگ مارچ کی کال واپس لے لی گئی۔ اس معاہدے کے نتیجے میں صدر آزاد جموں و کشمیر بیرسٹر سلطان محمود چوہدری نے متنازعہ آرڈیننس ’’پیس فل اسمبلی اینڈ پبلک آرڈر آرڈیننس 2024‘‘ کو واپس لے لیا، اور اس کا نوٹیفکیشن بھی جاری کر دیا گیا۔
عوامی ایکشن کمیٹی اور حکومتی وزیر نے ایک 12 نکاتی معاہدے پر دستخط کیے، جس کے تحت متعدد اہم مطالبات کی تکمیل کی یقین دہانی کرائی گئی۔ معاہدے کے مطابق، جوائنٹ عوامی ایکشن کمیٹی کے چارٹر آف ڈیمانڈ پر چھ ماہ میں بات چیت کے ذریعے عمل درآمد کیا جائے گا۔ اس کے علاوہ، 50 کے علاوہ باقی تمام ایف آئی آرز کو 90 دن کے اندر ختم کرنے کا فیصلہ کیا گیا۔
معاہدے میں شامل اہم نکات میں شامل ہیں:
برطرف ملازم صہیب عارف کو سات دن کے اندر بحال کیا جائے گا۔
اظہر شہید کے بھائی کو سات دن کے اندر سرکاری ملازمت دی جائے گی۔
چار زخمیوں کو فی کس 10 لاکھ روپے معاوضہ سات دن کے اندر ادا کیا جائے گا۔
آٹے کا معیار بہتر کیا جائے گا اور آبادی کے مطابق دستیابی کو یقینی بنایا جائے گا۔
بجلی میٹروں کی خریداری آئندہ مالی سال میں ای ٹینڈر کے ذریعے کی جائے گی۔
اس معاہدے کے بعد، صدر آزاد کشمیر نے صدارتی آرڈیننس واپس لینے کا نوٹیفکیشن کوہالہ میں عوامی ایکشن کمیٹی کے قائدین کے حوالے کیا۔ اس کے بعد عوامی ایکشن کمیٹی نے کوہالہ سے برارکوٹ کا رخ کیا۔
متنازعہ آرڈیننس کے تحت گرفتار افراد کو رہا کر دیا گیا، اور صدر آزاد کشمیر نے حکومت کو آرڈیننس واپس لینے کی ہدایت بھی کی تھی۔ حکمران اتحاد میں شامل پیپلز پارٹی اور مسلم لیگ ن نے بھی آرڈیننس کی واپسی کا مطالبہ کیا تھا۔
عوامی ایکشن کمیٹی نے یہ بھی اعلان کیا کہ چار دن سے جاری شٹر ڈاؤن ختم ہو گیا ہے، اور ٹرانسپورٹرز کو گاڑیاں چلانے کی اجازت دے دی گئی ہے۔ کمیٹی نے مزید کہا کہ 90 روز کے اندر 12 نکاتی چارٹر آف ڈیمانڈ پر عمل کیا جائے گا۔
