سندھ حکومت کا ایڈز بارے عوامی آگاہی مہم شروع کرنیکا فیصلہ

سندھ حکومت نے ایڈز کے بڑھتے ہوئے پھیلاؤ کے پیش نظر عوام میں آگاہی پیدا کرنے کے لیے مہم شروع کرنے کا فیصلہ کیا ہے۔

ایڈز کے عالمی دن کے موقع پر منعقدہ ایک پروگرام میں خطاب کرتے ہوئے وزیراعلیٰ سندھ مراد علی شاہ نے کہا کہ معاشرے میں ایڈز کے بڑھتے ہوئے کیسز ایک تشویش ناک امر ہے اور اس موذی مرض کے خلاف جنگ ہم سب کی مشترکہ ذمہ داری ہے۔ انہوں نے مزید کہا کہ صحت مند معاشرہ ہر فرد کی ضرورت ہے اور ایڈز کے بارے میں عوامی آگاہی مہم چلانا وقت کی اہم ضرورت ہے۔ سندھ حکومت ایڈز کے پھیلاؤ کے تدارک کے لیے مؤثر اقدامات کر رہی ہے۔

وزیراعلیٰ سندھ نے نعرہ لگایا: “آئیں، زندگی کی قدر کریں اور زندگی کو بچائیں”۔ انہوں نے ایڈز کے وائرس کے بارے میں بات کرتے ہوئے کہا کہ یہ وائرس انسان کے مدافعتی نظام کو شدید نقصان پہنچاتا ہے اور آہستہ آہستہ مہلک بن جاتا ہے۔

انہوں نے یہ بھی کہا کہ مناسب علاج، دیکھ بھال اور بہتر سپورٹ کے ذریعے ہم اس مرض سے بچاؤ حاصل کر سکتے ہیں۔ اس ضمن میں سندھ حکومت بھرپور آگاہی مہم شروع کرے گی تاکہ لوگوں کو اس خطرناک بیماری سے بچنے کے لیے معلومات فراہم کی جا سکیں۔