سرینگر: غیرقانونی طور پر بھارت کے زیر قبضہ جموں و کشمیر میں بھارتی فوجیوں نے اپنی ریاستی دہشت گردی کی جاری کارروائیوں میں گزشتہ ماہ نومبر میں ایک خاتون سمیت 9 کشمیریوں کو شہید کر دیا۔
اعداد و شمار کے مطابق، شہید ہونے والوں میں سے چار کو جعلی مقابلوں میں یا دوران حراست شہید کیا گیا۔ اس دوران 12 کشمیری شدید زخمی ہوئے، جبکہ 160 افراد کو، جن میں زیادہ تر حریت کارکن تھے، کالے قوانین پبلک سیفٹی ایکٹ (PSA) اور غیر قانونی سرگرمیوں کی روک تھام کے قانون یواے پی اے کے تحت گرفتار کیا گیا۔ بھارتی فوجیوں نے محاصرے اور تلاشی کی 196 کارروائیوں اور گھروں پر چھاپوں کے دوران ان افراد کو گرفتار اور زخمی کیا۔ بھارتی فورسز کے ہاتھوں ہونے والی شہادتوں کے نتیجے میں تین بچے یتیم ہو گئے۔ بھارتی فورسز نے ان کارروائیوں کے دوران دو گھروں کو بھی تباہ کر دیا۔
دریں اثناء، بی جے پی کی زیر قیادت بھارتی حکومت نے کشمیری عوام کی سیاسی امنگوں کو دبانے کے لیے کالے قوانین کا استعمال کرتے ہوئے 140 جائیدادیں ضبط کر لیں، جن میں زمینوں، مکانات اور دکانوں کی جائیدادیں شامل ہیں۔
