سابق کرکٹر و چیف سلیکٹر وہاب ریاض نے بالی ووڈ اداکارہ کترینہ کیف اور شعیب اختر کی دوستی کے بارے میں دلچسپ انکشاف کیا ہے۔
حال ہی میں وہاب ریاض نے معروف کامیڈین تابش ہاشمی کے پروگرام ‘ہنسنا منع ہے’ میں شرکت کی، جہاں انہوں نے قومی ٹیم کی خراب کارکردگی اور بورڈ کے فیصلوں پر تنقید کی۔ اس پروگرام میں انہوں نے ڈریسنگ روم کی کچھ مضحکہ خیز کہانیاں بھی شیئر کیں۔
وہاب نے ایک واقعہ کا ذکر کرتے ہوئے کہا کہ جب وہ نیوزی لینڈ کے دورے پر تھے، تو وہ سب کھلاڑی شعیب اختر کے کمرے میں کھانا کھا رہے تھے۔ اس دوران ٹی وی پر کترینہ کیف کا مشہور گانا ‘شیلا کا جوانی’ چل رہا تھا۔ شعیب اختر نے یہ دیکھ کر کہا کہ وہ کترینہ کیف کو جانتے ہیں اور ان کے ساتھ دوستی بھی ہے۔
وہاب نے مزید بتایا کہ شعیب اختر کی اس بات پر محمد حفیظ حیران رہ گئے اور انہیں اس بات پر یقین ہی نہیں آیا۔ جب کسی نے شعیب کی بات کا یقین نہیں کیا تو انہوں نے غصے میں آ کر سب کو کمرے سے باہر نکال دیا، کہ “تم لوگ مجھے جھوٹا سمجھتے ہو!”
وہاب نے کہا کہ شعیب کے کمرے سے باہر نکالنے کے بعد کھلاڑیوں نے ریسٹورنٹ جا کر کھانا کھایا۔
یہ بات قابل ذکر ہے کہ شعیب اختر نے 2008 میں انڈین پریمیئر لیگ (آئی پی ایل) میں کولکتہ نائٹ رائیڈرز کی نمائندگی کی تھی اور انہیں بالی ووڈ کے کنگ شاہ رخ خان اور سلمان خان کا قریبی دوست سمجھا جاتا ہے۔
