اسلام آباد\۔ ملک بھر میں جائیداد کی منتقلی پر فیڈرل ایکسائز ڈیوٹی کی شرح 7 فیصد تک پہنچ چکی ہے۔فیڈرل بورڈ آف ریونیو (ایف بی آر) کمرشل پراپرٹی کی الاٹمنٹ یا منتقلی اور کھلے پلاٹوں یا رہائشی املاک کی پہلی الاٹمنٹ یا منتقلی پر، اگر خریدار فعال ٹیکس دہندگان کی فہرست میں شامل ہو، تو 3 فیصد فیڈرل ایکسائز ڈیوٹی وصول کرے گا۔
فیڈرل ایکسائز ایکٹ 2005 کے تحت، یہ ڈیوٹی کمرشل پراپرٹی کی الاٹمنٹ یا منتقلی اور کسی بھی ڈویلپر یا بلڈر کی طرف سے کھلے پلاٹ یا رہائشی جائیداد کی پہلی الاٹمنٹ یا منتقلی پر ایف بی آر کی متعلقہ شرائط اور پابندیوں کے مطابق عائد ہوگی۔
اگر خریدار جائیداد کے حصول کی تاریخ پر انکم ٹیکس آرڈیننس 2001 کے تحت فعال ٹیکس دہندگان کی فہرست میں موجود ہے، تو فیڈرل ایکسائز ڈیوٹی مجموعی رقم کا 3 فیصد ہوگی۔
اگر خریدار نے مقررہ تاریخ تک انکم ٹیکس ریٹرن فائل نہیں کیا ہے، تو فیڈرل ایکسائز ڈیوٹی کی شرح خریداری کی کل رقم کا 5 فیصد ہوگی، جیسا کہ انکم ٹیکس آرڈیننس 2001 کے دسویں شیڈول کے رول میں بیان کیا گیا ہے۔
اگر خریدار جائیداد کے حصول کی تاریخ پر انکم ٹیکس آرڈیننس 2001 کے سیکشن 181 اے کے تحت فعال ٹیکس دہندگان کی فہرست میں شامل نہیں ہے، تو فیڈرل ایکسائز ڈیوٹی کی شرح خریداری کی کل رقم کا 7 فیصد ہوگی۔
ایف بی آر نے 30 جون 2024 تک سیلز ٹیکس ایکٹ 1990 اور فیڈرل ایکسائز ایکٹ 2005 میں اپڈیٹس جاری کی ہیں، جن میں فائنانس ایکٹ 2024 کے ذریعے کی گئی ترامیم بھی شامل ہیں۔
نظرثانی شدہ فیڈرل ایکسائز ایکٹ 2005 کے مطابق، اگر کوئی خوردہ فروش سگریٹ کے پیک کو بغیر ٹیکس اسٹامپ، بینڈرول، اسٹیکرز، لیبل، یا بارکوڈ کے فروخت کرتا ہے، تو ایسے شخص کا ریٹیل آؤٹ لیٹ سیل کر دیا جائے گا۔
