پاکستان کرکٹ بورڈ نے نیوزی لینڈ کے دورے کے لیے قومی ٹیم کے ون ڈے اور ٹی ٹوئنٹی اسکواڈ کا اعلان کر دیا ہے، جس میں چار اہم کھلاڑیوں کو اسکواڈ سے باہر کر دیا گیا ہے۔
قومی ٹیم کے ون ڈے اسکواڈ سے فاسٹ بولرز شاہین شاہ آفریدی اور حارث رؤف کو جبکہ ٹی ٹوئنٹی اسکواڈ سے محمد رضوان اور بابراعظم کو ڈراپ کیا گیا ہے۔
ڈومیسٹک کرکٹ میں شاندار کارکردگی کا مظاہرہ کرنے والے حسن نواز، عاکف جاوید، محمد علی اور عبدالصمد کو اسکواڈ میں شامل کیا گیا ہے۔
عاقب جاوید اس دورے میں عبوری ہیڈ کوچ کے طور پر ذمہ داری نبھائیں گے، جبکہ محمد یوسف کو بیٹنگ کوچ مقرر کیا گیا ہے۔
پریس کانفرنس کے دوران عاقب جاوید نے بتایا کہ محمد رضوان کی جگہ سلمان علی آغا کو ٹی ٹوئنٹی ٹیم کا کپتان مقرر کیا گیا ہے، جبکہ شاداب خان نائب کپتان ہوں گے۔ نیوزی لینڈ کے خلاف ٹی ٹوئنٹی سیریز میں سلمان علی آغا ٹیم کی قیادت کریں گے۔
عاقب جاوید نے یہ بھی کہا کہ محمد رضوان ون ڈے ٹیم کی قیادت کریں گے، اور صائم ایوب، کامران غلان، سعود شکیل اور محمد حسنین کو ون ڈے اسکواڈ سے باہر کیا گیا ہے۔
شاداب خان کو ٹی ٹوئنٹی کا نائب کپتان بنائے جانے پر عاقب جاوید نے کہا کہ شاداب خان کی انجری کے سبب ان کی پرفارمنس متاثر ہوئی تھی، لیکن اب وہ مکمل طور پر فٹ ہیں۔ انہوں نے مزید کہا کہ نئے کھلاڑیوں کو موقع نہ دیا جائے تو نیا ٹیلنٹ سامنے نہیں آ سکے گا۔
عاقب جاوید نے چیمپیئنز ٹرافی میں بری کارکردگی کی ذمہ داری قبول کی اور کہا کہ شاہین شاہ آفریدی اب بھی ٹی ٹوئنٹی کے بہترین بولر ہیں۔
پاکستان ٹیم نیوزی لینڈ کے دورے میں 16 مارچ سے 5 اپریل تک پانچ ٹی ٹوئنٹی انٹرنیشنل اور تین ون ڈے انٹرنیشنل میچز کھیلے گی۔
ون ڈے اسکواڈ: کپتان: محمد رضوان
نائب کپتان: سلمان علی آغا
کھلاڑی: عبداللہ شفیق، امام الحق، طیب طاہر، بابراعظم، ابرار احمد، عاکف جاوید، فہیم اشرف، خوش دل شاہ، محمد علی، محمد وسیم جونیئر، محمد عرفان خان، نسیم شاہ، سفیان مقیم
ٹی ٹوئنٹی اسکواڈ: کپتان: سلمان علی آغا
نائب کپتان: شاداب خان
کھلاڑی: عبدالصمد، ابرار احمد، حارث رؤف، حسن نواز، جہانداد خان، خوش دل شاہ، محمد عباس آفریدی، محمد علی، محمد حارث، محمد عرفان خان، عمیر بن یوسف، شاہین شاہ آفریدی، سفیان مقیم، عثمان خان
