نائب وزیر اعظم اور وزیر خارجہ سینیٹر اسحاق ڈار نے کمپیٹیشن کمیشن آف پاکستان کے نئے ہیڈ آفس کا سنگ بنیاد رکھنے کی تقریب سے خطاب کرتے ہوئے کہا کہ ہم نے اینٹی مناپلی قانون کو مزید مضبوط کیا ہے، تاہم لوگوں کو مناپلی کے بارے میں زیادہ آگاہی نہیں ہے۔ انہوں نے کہا کہ چیئرمین کمپیٹیشن کمیشن ڈاکٹر کبیر سدھو سی سی پی کو کامیابی سے آگے بڑھا رہے ہیں۔
کمپیٹیشن کمیشن آف پاکستان کے نئے ہیڈ آفس کا سنگ بنیاد رکھنے کی اس تقریب میں نائب وزیر اعظم اسحاق ڈار کے علاوہ وفاقی وزرا محمد اورنگزیب، اعظم نذیر تارڑ اور وزیر مملکت علی پرویز ملک بھی شریک ہوئے۔
چیئرمین کمپیٹیشن کمیشن کبیر احمد سدھو نے تقریب سے خطاب کرتے ہوئے کہا کہ سی سی پی ہیڈ آفس کا سنگ بنیاد ایک یادگار لمحہ ہے، اور اس نئے ہیڈ آفس سے کمیشن کی استعداد کار میں اضافہ ہوگا۔ اس سے سی سی پی کے تمام ملازمین ایک ہی جگہ پر کام کر سکیں گے، اور کرایہ کی مد میں بچت ہونے سے دیگر شہروں میں سی سی پی کے دفاتر کھولنے کی کوشش کی جائے گی۔
انہوں نے مزید کہا کہ سی سی پی نے گزشتہ 14 ماہ میں 140 پری مرجر درخواستوں کو منظور کیا ہے اور حال ہی میں کارٹلائزیشن کے خلاف مہم کا آغاز کیا ہے۔ سی سی پی نے مارکیٹ انٹیلیجنس یونٹ کے نام سے نیا ڈپارٹمنٹ بھی شروع کیا ہے اور اس کے علاوہ ایک سینٹر آف ایکسلینس بھی قائم کیا جا رہا ہے تاکہ ریسرچ کی صلاحیتوں میں مزید اضافہ ہو سکے۔
وفاقی وزیر قانون اعظم نذیر تارڑ نے تقریب میں کہا کہ چیئرمین سی سی پی کی قیادت پر مکمل اعتماد ہے اور انہیں اور ان کی ٹیم کو مبارکباد پیش کی۔ وفاقی وزیر خزانہ محمد اورنگزیب نے کہا کہ سی سی پی کے لیے اپنی بلڈنگ کا ہونا اہم ہے، اور ان کے اقدامات کا تسلسل ضروری ہے۔
وزیر مملکت علی پرویز ملک نے کہا کہ سی سی پی ایک اہم ریگولیٹری ادارہ ہے جو مارکیٹ اور معیشت کی بہتری میں اہم کردار ادا کر رہا ہے۔
نائب وزیر اعظم اسحاق ڈار نے اپنی تقریر میں کہا کہ مافیا نے پاکستان میں اسٹاک ایکسچینجز کو ایک ہونے سے روکنے کی کوشش کی تھی، تاہم اللہ تعالیٰ نے پاکستان کو معدنیات کی دولت سے نوازا ہے اور وہ دن دور نہیں جب پاکستان ترقی یافتہ ممالک کی صف میں شامل ہوگا۔ انہوں نے مزید کہا کہ 2018 میں پاکستان دنیا کی 24ویں معیشت تھا اور وہ جی 20 میں شامل ہونے سے صرف 4 قدم پیچھے تھا۔ اس موقع پر اسحاق ڈار نے یہ بھی کہا کہ 4 مارچ کو وزیراعظم شہباز شریف کی حکومت کو ایک سال مکمل ہوا اور اسی دن سی سی پی ہیڈ آفس کا سنگ بنیاد بھی رکھا جا رہا ہے۔
