باکو: وزیراعظم شہباز شریف نے کہا ہے کہ پاکستان اور آذربائیجان کے درمیان دو ارب ڈالر کی سرمایہ کاری کے معاہدوں کو ایک ماہ کے اندر حتمی شکل دینے پر اتفاق کیا گیا ہے۔ ہم مختلف شعبوں میں آذربائیجان کے تعاون کے لیے شکر گزار ہیں۔
آذربائیجان کے دارالحکومت باکو میں بزنس فورم سے خطاب کرتے ہوئے وزیراعظم شہباز شریف نے کہا کہ دونوں ممالک کی قیادت کے درمیان مثبت اور تعمیری گفتگو ہوئی، جس سے باہمی تجارت کو مزید وسعت دی جائے گی۔ انہوں نے بتایا کہ دو ارب ڈالر کی سرمایہ کاری کے معاہدوں کو ایک ماہ میں مکمل کرنے پر اتفاق رائے پایا گیا ہے، جبکہ دفاعی پیداوار سمیت مختلف شعبوں میں تعاون کو بھی مزید بڑھایا جائے گا۔
وزیراعظم کا کہنا تھا کہ پاکستان میں غیر ملکی سرمایہ کاروں کو سہولتیں فراہم کی جا رہی ہیں، اور دونوں ممالک کے درمیان معاشی سرگرمیوں سے اقتصادی استحکام کو فروغ ملے گا۔
قبل ازیں، وزیراعظم نے کاراباخ جنگ کے ہیروز کو خراج عقیدت پیش کرنے کے لیے باکو میں ایک یادگار پر حاضری دی اور پھولوں کی چادر چڑھائی۔
