پاکستان اور آذربائیجان کے درمیان تجارت، دفاع، موسمیاتی تبدیلی اور تعلیم سمیت مختلف شعبوں میں تعاون بڑھانے پر اتفاق کیا گیا ہے، اور اس سلسلے میں کئی اہم معاہدوں اور مفاہمت کی یادداشتوں (ایم او یوز) پر دستخط کیے گئے ہیں۔
وزیراعظم شہباز شریف نے آذربائیجان کے دارالحکومت باکو میں صدر الہام علیوف سے ملاقات کی، جس میں دونوں رہنماؤں نے مختلف شعبوں میں تعاون بڑھانے پر بات چیت کی۔ اس موقع پر آذربائیجان کے صدر نے کہا کہ دونوں ممالک کے تجارتی اور اقتصادی تعلقات میں مزید بہتری لانے کے بے شمار مواقع ہیں، اور وہ اس بات پر متفق ہیں کہ حالیہ معاہدوں کو ایک ماہ کے اندر حتمی شکل دی جائے گی۔
پاکستانی وزیراعظم نے اس موقع پر خطاب کرتے ہوئے کہا کہ پاکستان اور آذربائیجان کے باہمی مفاد کے مشترکہ منصوبے دونوں ملکوں کے عوام کے لیے فائدہ مند ثابت ہوں گے۔ وزیراعظم شہباز شریف نے یہ بھی کہا کہ طے پانے والے معاہدوں کو جلد حتمی شکل دینے پر اتفاق کیا گیا ہے۔
وزیراعظم کی آذربائیجان آمد پر صدارتی محل میں شاندار استقبال کیا گیا، جہاں انہیں گارڈ آف آنر پیش کیا گیا اور دونوں ممالک کے قومی ترانے بجائے گئے۔ اس موقع پر آذربائیجان کے اعلیٰ حکام اور پاکستانی وفد نے تقریب میں شرکت کی۔ وزیراعظم شہباز شریف کے ہمراہ نائب وزیراعظم اور وزیر خارجہ اسحٰق ڈار سمیت دیگر وزرا بھی موجود تھے۔
اس دورے کے دوران وزیراعظم شہباز شریف آذربائیجان کے صدر کے ساتھ ملاقات کے علاوہ بزنس فورم سے بھی خطاب کریں گے، جس میں وہ دونوں ممالک کے درمیان اقتصادی اور تجارتی تعلقات کو مزید مستحکم کرنے پر زور دیں گے۔
