اسلام آباد۔۔۔آئی ایم ایف کا تکنیکی وفد کلائمیٹ فنانسنگ کے حوالے سے مذاکرات کے لیے اسلام آباد پہنچ چکا ہے۔
ذرائع کے مطابق موسمیاتی تبدیلیوں کے اثرات کا مقابلہ کرنے کے لیے کلائمیٹ فنانسنگ کے حصول میں پیش رفت ہوئی ہے، اور اسی سلسلے میں بین الاقوامی مالیاتی فنڈ (آئی ایم ایف) کا تکنیکی وفد اسلام آباد میں کلائمیٹ فنانسنگ پر بات چیت کے لیے پہنچا ہے۔
آئی ایم ایف کا 4 رکنی وفد وفاقی اور صوبائی حکام کے ساتھ مذاکرات کرے گا، جس دوران گرین بجٹنگ، کلائمیٹ سپینڈنگ پر ٹیگنگ، ٹریکنگ اور رپورٹنگ کے معاملات پر بات ہوگی۔
مذاکرات میں آئندہ مالی سال 2025-26 کے بجٹ میں کاربن لیوی عائد کرنے کے حوالے سے بھی گفتگو کی جائے گی۔ ذرائع کے مطابق آئی ایم ایف وفد کے ساتھ ہونے والے آئندہ مذاکرات میں ابتدائی مسودے پر غور کیا جائے گا۔
آئی ایم ایف کی جانب سے کاربن لیوی عائد کرنے پر تجاویز بھی دی جائیں گی۔ اس سلسلے میں آج سے 28 فروری تک وفاق اور صوبوں کے ساتھ تکنیکی سطح پر مذاکرات ہوں گے، جن میں کاربن لیوی کے نفاذ، الیکٹریکل وہیکلز اور سبسڈیز پر بھی بات چیت کی جائے گی۔
ذرائع نے بتایا کہ آئی ایم ایف وفد آئندہ بجٹ میں گرین بجٹنگ کو مزید بڑھانے کے لیے بھی تجاویز دے گا۔ مذاکرات کے پہلے دن صرف موسمیاتی تبدیلی کے لیے کیے جانے والے اقدامات پر بات چیت ہوگی، جس میں وفاق اور صوبوں کے موسمیاتی اقدامات پر تفصیل سے بریفنگ دی جائے گی۔
