بھارتی کرکٹر یوزویندر چہل اور ان کی اہلیہ دھنشری ورما کی علیحدگی کی خبریں بالآخر حقیقت بن گئیں۔ سوشل میڈیا پر کئی ماہ سے گردش کرنے والی افواہیں درست ثابت ہوئیں، اور جمعرات کے روز ممبئی کے باندرہ فیملی کورٹ میں ان کی طلاق کی حتمی سماعت مکمل ہوئی۔
بھارتی میڈیا کے مطابق، عدالت نے جوڑے کو تقریباً 45 منٹ تک مشاورت (کاؤنسلنگ) کے لیے کہا تاکہ معاملات سلجھائے جا سکیں، تاہم دونوں نے باہمی رضامندی سے علیحدگی کے فیصلے پر قائم رہنے کا اظہار کیا۔ رپورٹس کے مطابق، وہ گزشتہ 18 ماہ سے الگ رہ رہے تھے اور طلاق کی بنیادی وجہ “کمپٹیبیلیٹی ایشوز” بتائی گئی ہے۔
سماعت سے قبل یوزویندر چہل نے سوشل میڈیا پر ایک جذباتی پوسٹ شیئر کی:
“خدا نے مجھے اتنی بار بچایا ہے کہ میں گن بھی نہیں سکتا۔ تو میں صرف تصور ہی کر سکتا ہوں کہ کتنی بار میں بچا ہوں اور مجھے معلوم بھی نہیں ہوا۔ شکریہ خدا، ہمیشہ میرے ساتھ رہنے کے لیے۔”
دھنشری ورما نے بھی انسٹاگرام پر ایمان اور بھروسے کے حوالے سے لکھا:
“پریشانی سے برکت تک کا سفر! حیرت انگیز ہے کہ خدا کس طرح ہماری مشکلات کو برکت میں بدل دیتا ہے۔ اگر آج آپ کسی چیز کو لے کر پریشان ہیں، تو یاد رکھیں کہ آپ کے پاس ایک انتخاب ہے۔ آپ یا تو پریشان رہ سکتے ہیں یا پھر سب کچھ خدا کے سپرد کر کے دعا کا راستہ اپنا سکتے ہیں۔ ایمان کی طاقت کو کم نہ سمجھیں، خدا ہر چیز کو ہمارے بھلے کے لیے بہتر بنا سکتا ہے۔”
بالآخر، جمعرات کی شام 4 بج کر 30 منٹ پر عدالت نے باضابطہ طور پر دونوں کی طلاق کی منظوری دے دی، اور یوں ان کی شادی کا باب ہمیشہ کے لیے بند ہو گیا۔
