ٹیکنالوجی کی دنیا میں ایک اہم پیش رفت کرتے ہوئے میٹا نے اپنے جدید ترین لارج لینگویج ماڈل (LLM) کے دو نئے ورژنز Llama 4 Scout اور Llama 4 Maverick لانچ کر دیے ہیں۔
میٹا کے مطابق یہ نئے ماڈلز ایک ملٹی موڈل اے آئی سسٹم کا حصہ ہیں جو نہ صرف ٹیکسٹ بلکہ ویڈیو، تصاویر اور آڈیو جیسے مختلف اقسام کے ڈیٹا کو مؤثر طور پر پراسیس کرنے اور آپس میں جوڑنے کی صلاحیت رکھتے ہیں۔ یہ سسٹم مختلف فارمیٹس میں موجود مواد کو ایک دوسرے میں تبدیل بھی کر سکتا ہے، جو اسے ایک ہمہ جہت پلیٹ فارم بناتا ہے۔
کمپنی نے ان ماڈلز کو اب تک کے اپنے سب سے جدید اور طاقتور AI سسٹمز قرار دیا ہے، جو ملٹی موڈیلیٹی کے شعبے میں اپنی نوعیت میں نمایاں ہیں۔
میٹا نے مزید وضاحت کی کہ Llama 4 Maverick اور Llama 4 Scout دونوں ماڈلز اوپن سورس کی بنیاد پر دستیاب ہوں گے، تاکہ ماہرین اور ڈیویلپرز ان میں بہتری لا سکیں یا اپنی ضرورت کے مطابق استعمال کر سکیں۔
کمپنی نے یہ بھی بتایا کہ ان دونوں ماڈلز کی تربیت Llama 4 Behemoth نامی ایک وسیع اور ذہین ترین لینگویج ماڈل کے زیرِ نگرانی کی گئی ہے، جسے خاص طور پر نئے ماڈلز کو سکھانے اور رہنمائی فراہم کرنے کے لیے تیار کیا گیا ہے۔
یہ پیش رفت اس رجحان کا حصہ ہے جو اوپن اے آئی کے ChatGPT کی کامیابی کے بعد دیکھنے میں آیا، جس کے بعد دنیا بھر کی بڑی ٹیک کمپنیاں مصنوعی ذہانت کے انفراسٹرکچر میں بڑے پیمانے پر سرمایہ کاری کر رہی ہیں۔ یہ تبدیلی ٹیکنالوجی کے منظرنامے کو ایک نئی شکل دے رہی ہے اور مشین لرننگ کے شعبے میں دلچسپی میں زبردست اضافہ دیکھنے میں آ رہا ہے۔
