کراچی: شہر قائد میں ٹریفک کے مسائل کے حل کے لیے نئے ٹریفک اور روڈ سیفٹی قوانین کا نفاذ کر دیا گیا ہے۔
آئی جی ٹریفک پولیس کی زیر صدارت ہونے والے اجلاس میں ٹریفک کی روانی بہتر بنانے اور سڑکوں کو محفوظ بنانے کے لیے سخت اقدامات کرنے کا فیصلہ کیا گیا۔ اس بات پر زور دیا گیا کہ ٹریفک قوانین پر سختی سے عمل درآمد کرایا جائے گا تاکہ سڑکوں پر حادثات کی تعداد کم ہو سکے۔
نئے قوانین کے تحت ٹرانسپورٹرز، موٹر سائیکل سواروں اور چنگچی رکشوں کے لیے خصوصی ہدایات جاری کی گئی ہیں۔ سڑکوں پر پانی گرانے والے واٹر ٹینکرز کے خلاف سخت کارروائی کی جائے گی، اور موٹر سائیکل سواروں کے لیے ہیلمٹ پہننا لازمی قرار دیا گیا ہے۔ خلاف ورزی کرنے والوں کے خلاف کریک ڈاؤن کیا جائے گا۔
آئی جی ٹریفک پولیس کی زیر صدارت اجلاس میں فیصلہ کیا گیا کہ موٹر سائیکل سواروں کو چین اسپاکٹ پر چین کور نصب کرنا ضروری ہوگا۔ ساتھ ہی ہیڈ لائٹ، ٹیل لائٹ، ہیزرڈ لائٹ اور انڈیکیٹرز کی درست حالت میں ہونے کی شرط رکھی گئی ہے۔ موٹر سائیکل سواروں کے لیے ریئر ویو مررز کا استعمال بھی لازمی ہوگا اور ڈرائیونگ لائسنس ساتھ رکھنا ضروری ہوگا۔ لین کی پابندی کے ساتھ ساتھ سڑک کے بائیں طرف چلنا ضروری ہوگا، اور اگر موٹر سائیکل سوار درمیان یا دائیں طرف چلیں گے تو ان کے خلاف جرمانہ عائد کیا جائے گا۔
اس کے علاوہ، گاڑیوں کے لیے جی پی ایس ٹریکر، ڈیش کیم، ریئر ویو کیم اور کیبن کیم نصب کرنا لازمی ہوگا تاکہ حادثات کی صورت میں شواہد محفوظ کیے جا سکیں اور ڈرائیور کے رویے کی نگرانی کی جا سکے۔ اجلاس میں یہ بھی فیصلہ کیا گیا کہ آئل ٹینکرز میں بفر پلیٹس لگانا ضروری ہوگا اور جدید ٹریفک مانیٹرنگ سسٹم نصب کیا جائے گا، جس میں آٹومیٹک نمبر پلیٹ ریکگنیشن کیمرے شامل ہوں گے تاکہ ریڈ سگنل توڑنے اور رفتار کی حد سے تجاوز کرنے والوں کا پتہ چلایا جا سکے۔
چنگچی رکشوں کے حوالے سے بھی اہم فیصلے کیے گئے ہیں۔ پانچ بڑی شاہراؤں پر چنگچی رکشوں کی آمد و رفت پر پابندی عائد کر دی گئی ہے، جن میں آئی آئی چندریگر روڈ، شاہین کمپلیکس تا ٹاور، شاہراہ فیصل، آواری سے اسٹار گیٹ، خلیق الزمان روڈ، سر شاہ سلیمان روڈ اور راشد منہاس روڈ شامل ہیں۔
ان تمام اقدامات کا مقصد شہر کی سڑکوں پر ٹریفک کی روانی کو بہتر بنانا اور حادثات کی شرح کو کم کرنا ہے۔
