اسلام آباد، کمپٹیشن کمیشن آف پاکستان (سی سی پی) نے فلائی جناح سروسز (پرائیویٹ) لمیٹڈ اور ایئر عربیہ اکیڈمی ایل ایل سی کے درمیان جوائنٹ وینچر کی منظوری دے دی ہے۔ مذکورہ دونوں کمپنیاں پاکستان میں ہوا بازی کی تربیت کی خدمات پیش کرنے کے لیے ایک نیا تربیتی ادارہ، فلائی جناح T3 فلائٹ اکیڈمی (پرائیویٹ) لمیٹڈ قائم کریں گی۔
کمپٹیشن کمیشن نے کمپیٹیشن (مرجر کنٹرول) ریگولیشنز 2016 کے تحت دونوں فریقین کی جانب سے جمع کرائی گئی پری مرجر کی درخواست کا جائزہ لیا۔ معاہدے کے مطابق، دونوں فریق نئی کمپنی میں سرمایہ کاری کریں گے۔
کمپٹیشن جائزے میں سامنے آیا ہے کہ یہ ٹرانزیکشن بین الاقوامی نوعیت کی ہے، جو متعلقہ شعبہ میں مسابقت پر اثرانداز نہیں ہوگی۔ فلائی جناح کمرشل ایئر لائن خدمات پیش کرتی ہے، جبکہ ایئر عربیہ اکیڈمی متحدہ عرب امارات میں ہوا بازی کی تربیت کے شعبہ سے وابستہ ہے۔ ایک الگ ادارے کے قیام کے لیے کیا گیا یہ جوائنٹ وینچر متوقع طور پر آزادانہ حیثیت میں کام کرے گا اور پاکستان میں ہوابازی کی تربیت کی خدمات کی دستیابی اور معیار کو بہتر بنائے گا۔
کمپٹیشن کمیشن نے تفصیلی جائزے کے بعد فیصلہ دیا ہے کہ اس جوائنٹ وینچر سے متعلقہ مارکیٹ میں مسابقت میں کمی یا غالب پوزیشن بننے کا امکان موجود نہیں، لہذا لہٰذا کمیشن نے کمپٹیشن ایکٹ کی دفعہ 31(1)(d)(i)کے تحت مرجر کی اجازت دے دی ہے۔
اس مشترکہ منصوبے کی بدولت ہوا بازی کے شعبے میں تکنیکی تربیت کے بنیادی ڈھانچے کی مضبوطی اور ہنر مندی کے نئے مواقع پیدا ہونے کے روشن امکانات ہیں۔
