اسلام آباد ۔وزیر دفاع خواجہ آصف نے کہا ہے کہ اگر ان کے استعفے سے معاملہ حل ہوسکتا ہے، تو وہ مستعفی ہونے کے لیے تیار ہیں اور انہیں اس پر کوئی اعتراض نہیں۔
پارلیمنٹ ہاؤس کے باہر میڈیا سے گفتگو کرتے ہوئے، ایک صحافی نے ان سے سوال کیا کہ اپوزیشن سانحہ جعفر ایکسپریس کی ذمہ داری ان پر عائد کر رہی ہے۔ اس پر خواجہ آصف نے کہا کہ اگر اپوزیشن کا مؤقف یہی ہے اور ان کے استعفے سے حالات بہتر ہو سکتے ہیں، تو وہ اس کے لیے تیار ہیں۔
انہوں نے مزید کہا کہ انہیں اپنے عہدے سے علیحدہ ہونے میں کوئی ہچکچاہٹ نہیں، اور اگر ان کے جانے سے معاملات بہتر ہو سکتے ہیں، تو وہ اپنی ذمہ داری نبھانے کے لیے تیار ہیں۔
خواجہ آصف نے یہ بھی وضاحت کی کہ سانحہ جعفر ایکسپریس کی تحقیقات جاری ہیں، اور تمام پہلوؤں کا باریک بینی سے جائزہ لیا جا رہا ہے۔
انہوں نے کہا کہ وہ اس معاملے پر پارلیمنٹ میں تفصیل سے گفتگو کرنے کے لیے تیار ہیں اور اپوزیشن کے ہر سوال کا جواب دینے میں کوئی تامل نہیں رکھتے۔
